АТГ-ын Мөрдөн шалгах хэлтсийн дарга, эрхэлсэн комиссар Х.Буянтүмэн нүүрсний гэх хэрэгт яллагдагчаар татагдсан нэр бүхий гишүүдийн талаар мэдээлэл өглөө. 

Тэрбээр "Нүүрсний хэрэг тойрсон асуудалд 10 гаруй жилийн хугацааны асуудлыг мөрдөн шалгаж байгаа учраас цаг хугацаа их орж байна. Мөрдөн шалгах ажиллагааны явцад шинээр хоёр гурван нөхцөл байдал тогтоогдож байна. Гашуун сухайтын хилээр Монгол Улс руу нэвтэрсэн тээврийн хэрэгслүүдийн бүртгэл дээр хянан шалгалт явуулж байна.

Одоогийн байдлаар 11 мянга гаруй тээврийн хэрэгслийн хилээр нэвтэрсэн мэдээллийг устгасан нөхцөл байдал тогтоогдсон. Үүнд мөрдөн шалгах ажиллагаа үргэлжлэн явагдаж байна.

Мөн нэр бүхий гишүүдийн бүрэн эрхийн асуудлыг хөндөх нөхцөл байдал үүсэж байна. УИХ-ын гишүүн Д.Бат-Эрдэнэ, Т.Аюурсайхан, Н.Наранбаатар нарын бүрэн эрхийн асуудлыг түтгэлзүүлэх саналыг УЕП-т хүргүүлж байна. Ж.Мөнхбат гишүүний хувьд эрүү үүсгэн яллагдагчаар татсан байгаа. Мөрдөн шалгах ажиллагааг богино хугацаанд хурдан шуурхай явуулахаар ажиллаж байна" гэв. 

Д.Батчулуун