Өвөрхангай аймгийн аравдугаар тойрогт АН-аас нэр дэвшигч Г.Батхүү, Д.Зоригт нарыг УИХ-ын гишүүний тангараг өргүүлэх болсонтой холбогдуулан МАН-ынхан эсэргүүцэж, жагсаал цуглаан зохион байгуулсан. Намын удирдлагууд нь Төрийн ордонд чуулганы танхимыг буйдангаар хаан таглан суусан. Тэдний эл үйлдлийг иргэд, гишүүд янз бүрээр хүлээн авч, өөр өөрсдийн өнцгөөр тайлбарласан. Харин АН болон МАН-аас бусад намын гишүүд хэрхэн тайлбарласныг түүвэрлэн хүргэж байна.
    Өвөрхангай аймгийн аравдугаар тойрогт АН-аас нэр дэвшигч Г.Батхүү, Д.Зоригт нарыг УИХ-ын гишүүний тангараг өргүүлэх болсонтой холбогдуулан МАН-ынхан эсэргүүцэж, жагсаал цуглаан зохион байгуулсан. Намын удирдлагууд нь Төрийн ордонд чуулганы танхимыг буйдангаар хаан таглан суусан. Тэдний эл үйлдлийг иргэд, гишүүд янз бүрээр хүлээн авч, өөр өөрсдийн өнцгөөр тайлбарласан. Харин АН болон МАН-аас бусад намын гишүүд хэрхэн тайлбарласныг түүвэрлэн хүргэж байна.

    УИХ-ын гишүүн, МАХН-МҮАН “Шударга ёс” эвслийн гишүүн Г.Уянга:

-Хуулийг гууль болгосноо, ардчиллыг булшилснаа, Монголыг ардчилсан улс биш болгосон ажлынхаа үр дүнгээ бариад ард түмэндээ тайлагнаж байна. Энэ хүмүүс өнгөрсөн 22 жилд хийсэн ажлуудаа тайлагнаж байна гэж би ойлголоо. Монголын шүүх хаана ч байсан нэг л хуулийг хэрэглэдэг. Хан-Уулын шүүх нэг шийдвэр гаргадаг, Өвөрхангай аймгийн шүүх бас өөр шийдвэр гаргадаг байж болохгүй шүү дээ. Хэрэв Хан-Уулын шүүх буруу байсан юм бол Өвөрхангайн шүүх зөв шийдвэр гаргах бололцоо байхгүй. Тэгэхээр энэ процесс бол монголын шүүх байгууллага яаж дампуурсаныг л харуулж байгаа юм. Монголын төр, монголын шүүх ямар байгаа нь сүүлийн 20 жил дангаараа төр барьсан энэ хүмүүсийн л үйлдвэрлэсэн зүйл шүү дээ

    УИХ-ын гишүүн Х.Болорчулуун:

-Бие даагчдын хувьд АН, МАН зэрэг намыг дэмжих нь гол биш ээ. Бие даагчид бол хараат бус, байр сууриа илэрхийлэх эрхтэй гишүүд.  Анхан шатны шүүхийн шийдвэрээр АН-ын гишүүдийг ялсанд тооцож, СЕХ шийдвэрээ гаргалаа.Уг нь бол шат шатны шүүх байх ёстой. Хуулийн дагуу процесс явагдаагүй байхад ийм шийдвэр гаргаж байгаа нь буруу юм гэсэн байр суурьтай байна.

УИХ-ын гишүүн Ц.Даваасүрэн:

-Бид бол тэр, энэ нам нь буруу, зөвийг шүүх тухай асуудал биш гэж бодож байна. Аль нэг намыг дэмжсэн байр суурь гаргаагүй. Энэ асуудалд бид энэ болж буй процесс нь манай парламентед  эерэг, сөрөг нөлөөллийг нь харж байна. Яагаад гэвэл АН-ын хоёр  гишүүн мөнгө тараасан гэдгийг тухайн намын доторхи хүнээс нь гарсан. Тэгээд ч АН-ын хоёр нэр дэвшигчийг мөнгө тараасан гэхэд эргэлзэхээргүй хүмүүс шүү дээ. Тиймээс энэ гаргаж байгаа шийдвэрийг эргэж нягтлах ёстой юм байна гэж үзсэн. СЕХ-оос гаргасан шийдвэрт Өвөрхангайн сонгогч түмэн бүгд 100 хувь итгэлтэй болсон байх ёстой юм. Аль аль нь мөнгө тараасан бол бүгдийнх нь нэрийг татаад дахин санал хураалт зохион байгуулах ёстой.

МАХН-ын Ерөнхий нарийн бичгийн дарга Г.Шийлэгдамба:

-Сонгууль будлиантай болсон нь бодитой зүйл. Үүнийг өнөөдөр МАН-ынхан илэрхийлж байгаа нь зөв. Үүнийгээ ямар үйл ажиллагаагаар илэрхийлж байна вэ гэдэг нь тэдний хэрэг. Хэрвээ биднийг байр сууриа илэрхийлж байхад байр сууриа илэрхийлсэн бол сонгуулийн будлиантай асуудал эрт шийдэгдэх байсан байх гэж бодож байна. Харамсалтай тэд үүнийг хожуу ухаарч, өнөөдөр байр сууриа илэрхийлж байна.

Ерөнхий сайд асан Д.Бямбасүрэн:

-Улстөрд олон үйл явдал өрнөж байна. Үүний дотроос хамгийн эмгэнэлтэй, өрөвдөлтэй үйл явдал бол Ардын намынхан Төрийн ордонд суулт хийж байгаа, гадаа нь цуглаан зохион байгуулсан явдал.


УИХ-ын гишүүн, МАХН-МҮАН “Шударга ёс” эвслийн гишүүн Ч.Улаан:

-Ер нь аливаа асуудлыг аль болох эв зүйгээр хуулийн хүрээнд ойлголцож шийдэж байх нь зүйтэй гэсэн байр суурьтай байдаг, би.  Тийм ч учраас одоогийн тавигдаад байгаа асуудлыг ойлголцож, хуулийн хүрээнд ямар нэг эргэлзээ төрүүлэхгүйгээр шийдэх нь зөв гэж бодож байна. Нэг талаас байр сууриа илэрхийлж байгаа нь зөв, нөгөө талаас харилцан ойлголцох, байр суурь баримтлах нь зүйтэй. Ингэж байж хэн хэн нь дараа нь эргэлзэхгүйгээр асуудлаа шийдсэн байх хэрэгтэй гэж бодож байна. Эвслийн гишүүд өөр өөрийн байр суурьтай байгаа. Бид СЕХ ялимгүй түргэдсэн шийдвэр гаргасан юм болов уу гэж бодож байна. Өмнө нь ч гэсэн манай эвслээс тавьсан сонгуулийн маргаантай асуудлаар түргэдсэн, хөнгөн гоомой үйлдэл гаргаж байсан. Тухайлбал, манайхаас нэр дэвшигчдийн нэрийг татах, асуудлыг шийдэхгүй байх үйлдэл гарч байсан. Тиймээс бид энэ асуудалд мөн ийм байдлаар хандсан байх вий гэсэн хардлага бол байна. Аль болохоор энэ асуудлыг маргаангүй, эргэлзээгүй болгосны дараа шийдвэр гаргах ёстой.