Facebook хуудас ашиглан иргэдэд хуурамч гар утас зардаг байсан ШУТИС-ийн төгсөх ангийн дөрвөн оюутны залилангийн хэргийг Чингэлтэй дүүргийн цагдаагийн хэлтэст шалгаж эхэлжээ.

Оюутнууд “Iphone-4”, “Samsung” маркийн сүүлийн үеийн гар утсыг хямдхан зарна хэмээн Facebook болон уншигч олонтой зарим мэдээллийн сайтын сэтгэгдэл үлдээх хэсэгт зар тараадаг байжээ.

Мэдээллийн дагуу утас авахыг хүссэн иргэдэд эхлээд жинхэнэ утсыг нь харуулдаг байна. Дараа нь ямар нэгэн шалтаг хэлж, худалдан авагчаас холдонгуутаа Хятадад үйлдвэрлэсэн хуурамч утсаар сольж, иргэдийг залилдаг байсныг цагдаагийнхан илрүүлжээ.

Энэ хэргийн талаар мөрдөн байцаагчаас тодруулсан юм. Тэрбээр “Бид эрэн сурвалжлах багийн тусламжтайгаар эл залилангийн хэргийг илрүүллээ. Оюутнууд 15 хүнийг залилсан нь тогтоогдсон. Энэ тоо цаашид өсч магадгүй. Хэрэг мөрдөн байцаалтын шатандаа байгаа тул өөр зүйл хэлэх боломжгүй” гэсэн юм.