Өнгөрсөн сарын 3-ны өдөр хичээлээ тараад гэртээ харьж явсан 12 настай  Есүгэн охин краны машинд даруулж амь насаа алдсан билээ. Харин өнөөдөр Есүгэн охины аав Батсайхан ерөнхийлөгчтэй уулзаж өөрийн захиаг хүргүүллээ. Энэ захианд хууль бус үйлдлийг зогсоож хариуцлага, хяналтыг нэмгэдүүлж “Монгол хүний амь нас үнэ цэнэтэй байхыг хуульчлан баталгаажуулж өгөхийг”  хүссэн билээ.
Батсайхан охины аав: Миний охин багаасаа л тэмцэгч охин байсан.  Энэ нь миний охины өдрийн тэмдэглэл, бичсэн шүлгүүдээс нь харагддаг. Тиймээс би охиныхоо шударга, энэрэнгүй нийгмийг бүтээх тэмцэлийг охиноо өнгөрсөний дараа ч үргэлжлүүлнэ. Тиймээс хүүхдүүдэд туслах зорилготой “Есүгэн” нэртэй сан байгуулсан. Бас үндэсний цэцэрлэгт хүрээлэнд охиныхоо хөшөөг босгох хүсэлтэй байгаагаа илэрхийллээ. Хамгийн чухал нь өнөөдөр монголд амьдарч байгаа хэний ч амьд явах баталгаа байхгүй байгаа учир үүнийг анхаарч хуулиудад өөрчлөлт оруулж дахиж хэзээ ч ийм санамсаргүй аваар гаргахгүй байх нөхцөлийг бүрдүүлж өгөхийг хүслээ.
Монгол улсын ерөнхийлөгч Ц.Элбэгдорж: ” Өмнө нь барилгын болон бусад салбарт хүний амь нас эрсэдсэн олон тохиолдол гарч байсан. Гэхдээ үүнийг байдаг аваар осол мэтээр хүлээн авч байсан. Харин кранд дарагдсан Есүгэн, тэнгис кино театрын барилгын төмөрт дарагдсан залуугийн хэргээс хойш барилгын салбар дахь энэ аваар осолд анхаарлаа хандуулж эхэлсэн. Тиймээс барилгын болон бусад салбарт анхаарлаа хандуулан авааргүй ажиллах нөхцөл боломжоор хангах хэрэгтэй. Мөн эргээд биелүүлээгүй тохиолдолд шаардлага хүргүүлээд л орхидоггүй, хариуцлага тооцдог алдаа дутагдлыг арилгадаг байх хэрэгтэйг анхаарууллаа. Барилгын асуудал яригдаж байгаа нь зөвхөн барилга дээр ажиллаж байгаа ажилчдын биш гадуур нь явж байгаа энгийн иргэдийн ч аюулгүй байдлын асуудал учир анхаарлаа хандуулах хэрэгтэй. Ерөнхийлөгчийн зүгээс есдүгээр сарын 3-ныг “Есүгэний нэрэмжит өдөр” болгож энэ эмгэнэлт өдрийг санаж байх хэрэгтэй” гэсэн санал гаргалаа.
Энэ саналыг  тэнд байсан Есүгэн охины аав, УИХ-ын эмэгтэй гишүүдийн төлөөлөл болсон Л.Эрдэнэчимэг гишүүн, Хууль зүйн сайд Х.Тэмүүжин, НИТХ-ын дарга Э.Бат-Үүл нар дэмжиж байлаа. Тиймээс есдүгээр сарын 3-ны өдрийг Есүгэн охины дурсгалыг хүндэтгэх, барилгын салбарын аюулгүй ажиллагааг хангах талаар анхаарах, монгол хүний амь насыг үнэ цэнэтэй байлгах өдөр болгохыг дэмжлээ.
Дээрх аймшигтай ослууд гарсанаас хойш монголын иргэд “Үндсэн хуулинд заагдсан эрүүл аюулгүй орчинд амьдрах эрх хаана байна, үүнийг төр засгийн зүгээс хэрхэн хангаж байна” гэдэг дээр анхаарлаа хандуулдаг болсон. Тиймээс иргэдийн энэ анхаарлыг сулруулахгүй байх, үүн дээр тулгуурлан хуулиндаа өөрчлөлт оруулж ард иргэдийн аюулгүй байдалд хандсан,  дахиж хэзээ ч ийм  эмгэнэлт зүйл гарахгүй байх нөхцөлөөр хангаж өгөх хэрэгтэйг холбогдох албаныхан анхааран ажиллахыг санууллаа.