Саппорогийн тойргоос Таван шарын уулзвар хүртэлх 3.2 км зам, Үндсэн хуулийн гудамж, Тээврийн товчооноос Баруун дөрвөн зам хүртэлх 0.3 км авто замыг шинэчлэн засвар хийжээ. Мөн Зүүн дөрвөн замын уулзвараас Офицеруудын ордон хүртэлх 2.3 км авто зам, Дамбадаржаагийн Цагдаагийн постоос Дамбадаржаагийн эцэс хүртэлх 1.6 км авто замын засвар, өргөтгөлийн ажлыг гүйцэтгэж дуусгасан байна. Харин Баянхошууны хуучин эцсийн автобусны буудлаас Үйлдвэрчний эвлэлийн гудамж хүртэлх замын ажлыг өнөөдөр дуусгаж ашиглалтад оруулах аж. Түүнчлэн Нарны замын зүүн хэсэг буюу Нарантуул захын урд уулзвараас Чулуун овооны уулзвар хүртэлх хоёр км авто зам болон Улаанхуарангийн зам, Эскадрилийн хөшөөнөөс Шар хадны зам хүртэлх 1.5 км авто замыг энэ долоо хоногт багтаан дуусгах юм байна. Танктай хөшөөний зам ирэх онд дуусах төлөвлөгөөтэй байсан хэдий ч автомашины зорчих хэсгийг ашиглалтад оруулжээ. Харин явган хүний замыг ирэх жилээс бэлэн болгох аж. Зам засварын ажлаас гадна "Нарны гүүр", "Сэлбийн хос гүүр" гэсэн томоохон бүтээн байгуулалт, засварын ажлыг гүйцэтгэснийг Автозамын газраас онцолж байв. Мөн Сансарын туннелийн урд, хойд гүүр, нүхэн гарц барих ажлыг хийж байгаа бөгөөд автомашин зорчих хэсгийг нээж байгаа аж. Нийслэлийн зам засварын ажилтай холбогдуулан 300 сая төгрөгийг 20 гудамжны 7500 метр талбайд замын нөхөн засвар хийхээр тусгасан байна.