Жил бүрийн арваннэгдүгээр сарын 1-нийг бид “Үндэсний өгөх өдөр” болгон тэмдэглэсээр гурав дахь жилтэйгээ золгож байна. “Өгөх өдөр хөдөлгөөн” ТББын санаачилгаар нэг нэгэндээ хайр энэрэл, урам зориг, сэтгэлийн дэм өгөх зорилготой энэхүү үйл ажиллагаа анх эхэлсэн. Энэ жил дээрх өдрийн хүрээнд АНУ-ын нэрт зохиолч Шел Силверстайны “Өглөгч мод” хэмээх номыг монгол хэлнээ орчуулж, хүүхэд залуучуудын хүртээл болгохоор зорьжээ. Тус номоор дамжуулан бага насны хүүхдүүдийг өгөх үйлсэд сургах, эцэг эхийн ачлал хайрыг мэдрүүлэх, зөв хүн болон төлөвшихөд нь туслах зорилготой аж.

Эхний ээлжинд 10 мянган ном хэвлүүлэн хот, хөдөөгийн сургуулиудад тараах юм байна. Мөн энэ өдөр Чингэлтэй дүүргийн VII хорооны 4800 айлын хашаанд тус бүр 10 мод суулгах юм байна. “Эдгээр айлууд Далан давхрын энгэрт ядуу, тарчиг аж төрөхийн зэрэгцээ хүүхэд багачууд нь хогон дунд өсөж байгаа тул үүнээс урьдчилан сэргийлэх, агаарын бохирдлоос хамгаалахын тулд мод суулгана. Эдгээр айлаас 16 хүнийг ажлын байраар хангаж, цэцэрлэгчээр ажиллуулна” хэмээн “Ирээдүй” ОУБ-ын гүйцэтгэх захирал С.Пүрэвсүрэн ярив.