Монгол Улсын Урлагийн Гавьяат зүтгэлтэн, Монголын Хөгжмийн Зохиолчдын холбооны шагналт, “Пентатоник” наадмын 5 удаагийн шагналт хөгжмийн зохиолч Л.Балхжавын “Миний дуунууд” уран бүтээлийн тоглолт 14 дэх жилдээ болох гэж байна. Энэ жилийн “Миний дуунууд” тоглолтонд Төрийн соёрхолт дуучин Д.Болд, МУГЖ дуучин Т.Ариунаа, Б.Сарантуяа, “Харанга” хамтлагийн дуучин Х.Лхагвасүрэн, “Sweetymotion, “Мотив”, “Гурван охин” хамтлаг, хөгжмийн зохиолч, төгөлдөр хуурч Б.Чинбат, ОХУ-ын Буриад улсын ардын жүжигчин Б.Амархүү гээд рок попынхон халуун ам бүлээрээ оролцоно.

“Миний дуунууд” тоглолт энэ жил нэлээд нүсэр бүрэлдэхүүнтэй болох аж. Үндэсний Дуу Бүжгийн Эрдмийн чуулгын найрал хөгжим, Улсын Филармонийн “Морин хуур” чуулга, Хөгжим Бүжгийн Коллежийн Симфони найрал хөгжмийн уран бүтээлчид бүрэн бүрэлдэхүүнээрээ оролцож, жинхэнэ хөгжимлөг үдшийг сонсогчдод бэлэглэнэ. Хөгжмийн зохиолч Л.Балхжавын тоглолт бүр гүн хүндэтгэл, сонирхолтой гэнэтийн бэлгээр дүүрэн болдог уламжлалтай. Дуулж, хуурдаж, бөмбөрдөж, сюрприз барьсан хөгжмийн зохиолч маань энэ жил ч бас сонирхолтой бэлэг үзэгч танд бэлдсэн нь дамжиггүй. Тоглолт өнөөдөр, маргааш, нөгөөдөр үргэлжлэх юм.