Цагдаагийн байгууллагаас урьд өмнө нь удаа дараа ял шийтгэл эдэлж байсан “рэкет этгээдүүдийн гэмт хэрэг”-ийн талаар мэдээлж байна. Энэ үеэр Эрүүгийн цагдаагийн албаны дарга, цагдаагийн хурандаа Т.Сүхболд мэдээлэл өглөө.
Тэрбээр "Зохион байгуулалттай гэмт бүлэглэл үүсэж болзошгүй эрсдэлээс урьдчилан сэргийлэх, тэдгээрийн гэмт хэрэг үйлдлийг таслан зогсоох, урд өмнө нь удаа дараа ял шийтгүүлсэн этгээдүүдэд гэмт хэргээс урьдчилсан сэргийлэх тухай хуулийн 41 дүгээр зүйл, хорих ял этгээдэд хналт тогтоох гэсэн хууль журмын дагуу цагдаагийн байгууллага удаа дараа хяналт тавин ажилладаг.
Энэ оны эхний улирлын байдлаар зохион байгуулалттай гэмт бүлэг байгуулах, түүнд элсэх, заасан гэмт хэргийн шинжийг агуулж байгаа найман бүлгийн 21 этгээдийн хууль бус үйлдлийг шалгаж, таван бүлгийн 13 этгээдийг эрүүгийн хэрэг үүсгэн яллагдагчаар татан шалгаж байна.
Захиргааны хяналт тавьж буй иргэдэд нийслэл дүүргийн цагдаагийн газар, хэлтсүүдэд хяналт тавин ажиллаж байна. Харин удаа дараа ял шийтгэл эдэлсэн этгээдүүдэд Эрүүгийн цагдаагийн албанаас хяналт тавин ажилладаг.
Одоогоор 11 этгээдэд мөрдөн шалгах ажиллагаа явуулж байна. Яллагдагчаар татан шүүх прокурорын байгууллагад шилжсэн 19 этгээд байна. Зорчих эрхийг хязгаарлах ял шийтгэл эдэлж буй гурван этгээд, хорих ял эдэлж буй зургаан этгээд байна. Удаа дараа ял шийтгэл эдэлсэн этгээдүүдээс зарим этгээдүүд нь дахин гэмт хэрэг үйлдэж, шүүхээр ял шийтгэл эдлэх тохиолдол гарч байна. Захиргааны хяналтад байхдаа зөв төлөвших, нийгэмшсэн хүмүүс ч бий. Урд өмнө нь ял шийтгэл эдэлсэн этгээдүүдэд тогтвортой гэмт хэрэг үйлдэж, бусдыг айлган сүрдүүлж буй гэмт бүлэг байхгүй" гэв.
Д.Батчулуун
