Өнөөдрийн УИХ-ын чуулганы ирц муу, 48 гишүүн ажиллаж байна. Ажилдаа ирээгүй гишүүдийн ихэнхи нь АН-ынхан байгаа тул Ц.Нямдорж сайд ихэд бухимдлаа. Тэрбээр УИХ-ын дарга З.Энхболдод хандан "АН-ынхан албан тушаал ярихаар бүгдээрээ гүйгээд ирдэг, энгийн хууль ярих гэхээр алга болчихдог байдал өнөөдөр давтагдаж байна. Та нар үнэнийг хэлэхэд 10 жил ийм байдалтай байлаа. АН-ын зургаахан гишүүн байна. Амарч, зугаалж яваа юм уу хайшаа юм? Телевизээр гоё юм яриад байдаг хэрнээ ингэж л ажлаа хийж байна шүү. Би наана чинь сууж байхдаа хэн хэн байхгүй байгаа талаар нэрийг нь танилцуулдаг байсан. Гишүүдийн суудал шүдгүй эмгэний ам шиг онгойгоод байна" гэв. Харин УИХ-ын дарга З.Энхболд ирц муу байгааг дэмжээд ажилдаа ирээгүй гишүүдийг танилцуулав. Өнөөдөр УИХ-ын гишүүн Ж.Батзандан, С.Баярцогт, Л.Болд, Б.Наранхүү, О.Баасанхүү нар гадаад томилолттой байгаа бол М.Зоригт гишүүн дотоод томлолтоор ажиллаж байгаа аж. Мөн С.Одонтуяа, Я.Санжмятав, Су.Батболд, Д.Ганхуяг нарын гишүүд өвчтэй байна. Харин ирцийн мэдээнд ямар нэг тайлбар өгөөгүй, ажилдаа ирээгүй арав орчим гишүүнийг ажил тасалсан гэж үзжээ. Үүнд, Ерөнхий сайд Н.Алтанхуяг, Р.Амаржаргал, М.Батчимэг, Ч.Сайханбилэг, С.Эрдэнэ, Ё.Отгонбаяр, Я.Содбаатар, Д.Тэрбишдагва, С.Оюун нар орж байна.

  Уг нь УИХ-ын гишүүн М.Батчимэг Ерөнхийлөгчийн дэргэдэх Иргэний танхимд болж байгаа гэр хороолын дахин төлөвлөлтийн талаарх хэлэлцүүлэгт оролцож, Д.Тэрбишдагва гишүүн МХЕГ-ын ажилтай танилцаж байгаа юм. Тэд УИХ-ын Тамгын газарт ажилдаа очоогүй талаарх тайлбар өгөөгүйгээс ийнхүү ажил тасалсан гэж тооцогджээ.

Т.Гэрэл