Буриадын нийслэл Улан Үд хотын дэд дарга Игорь Зураев энэ долоо хоногт Монголын одонгоор энгэр цоолов. 10 дугаар сарын 26-нд болсон хотын захиргааны хуралдаан дээр Улаан Үд хотын дарга Геннадий Айдаев орлогчдоо баяр хүргэж үг хэлэхдээ:
  -Буриадаас тийм ч олон хүн энэ одонг хүртээгүй юм. Игорь Зураев монголчуудтай эртнээс хамтран ажиллаж ирсэн гавъяатай хүн бөгөөд энэ хүндтэй шагналын ачаар хамтын ажиллагаа маань улам өргөжинө биз ээ. Та бүхний дунд ч энэ одонг хүртэх хүмүүс бий гэдэгт би итгэж байна гэжээ.
  Монгол, Орос хоёр улсын харилцааг хөгжүүлэхэд хувь нэмэр оруулсныхаа төлөө хотын дарга Г.Айдаев ч бас 2009 оны 3 дугаар сард “Алтан гадас”-аар шагнуулж байсан юм. Өмнө нь Монголын төр засгийн дээд шагнал болох энэ одонгоор Буриадаас  Леонид Потапов, Вячеслав Наговицын зэрэг тэргүүн, ОХУ-ын Төрийн думд тус нутгийг төлөөлж сонгогдсон депутат Михаил Слепенчук,  Буриадын драмын захирал асан Доржи Сультимов шагнуулж байжээ.