УОК-оос цаг агаарын урьдчилсан мэдээ, халдварт өвчин, үер усны гамшгийн нөхцөл байдлын талаар мэдээлэл өглөө.
Тус үеэр ЦУОШГ-ын даргын үүргийг түр орлон гүйцэтгэгч Л.Оюунжаргал, “Долдугаар сарын эхний долоон хоногт 4-6-ны өдрүүдэд төвийн аймгуудын нутгаар, Улаанбаатар хот орчимд Туул, Сэлбэ, Санзай голуудад үерийн нөхцөл байдал үүссэн. Энэ бол үргэлжилсэн борооны улмаас ийм нөхцөл байдалд хүрсэн. Харин өнгөрсөн 23-ны өдөр орсон түр зуурын хүчтэй аадар борооноос Улаанбаатар хот орчимд үерийн нөхцөл байдал дахин үүссэн. Энэ борооны үеэр хот орчмоор 26-86 мм орчим бороо орсон.
86 мм гэдэг нь Монгол орны хэмжээнд 3 цагт 50 мм-ээс дээш бороо орсон тохиолдолд гамшигт үзэгдлийн хэмжээнд бороо орлоо гэж үздэг.
Харин өнөөдрөөс эхлээд баруун аймгуудын баруун өмнөд хэсгээр халж эхэлж байна. Баянхонгор аймгийн Шинэжинст сумын нутагт 40 хэм хүрч халж, говийн аймгийн нутгуудаар 6-7 хоног халах төлөвтэй байна. Ер нь ихэнх нутгаар ингэж хална.
Хангай, хөвсгөлийн уулархаг нутгаар 30-нд бага зэргийн бороотой, 31-нд Алтай, Хангай, Хөвсгөлийн уулархаг нутгаар түр зуурын аадар бороотой. Наймдугаар сарын 1-нээс жаахан бороошиж эхэлнэ. Баруун аймгуудын нутгийн зарим газраар, төвийн аймгуудын нутгийн баруун хэсгээр бороо орно. Баруун аймгуудад ер нь хуурай байгаа учир бороо нэлээн бага хэмжээтэй орохоор байна.
Наймдугаар сарын 20-нд төв, зүүн, говийн аймгуудын нутгийн зарим газраар дуу цахилгаантай аадар бороо орно. Энэ бороо их халалтын дараа орж байгаа учраас аянга цахилгаантай буюу усархаг бороо орох нөхцөл байдал бүрдэж байна. Тиймээс наймдугаар сарын 1, 2-нд орох бороо нь үерийн нөхцөл байдлыг дагуулж болзошгүй.
Их халалтын үеэр Монгол Алтай, Хөвсгөл, Хэнтийн уулархаг нутгаар шөнөдөө 7-12 хэм, өдөртөө 24-29 хэм, говийн бүс нутгаар шөнөдөө 22-27 хэм, өдөртөө 37-42 хэм, Их нууруудын хотгор, говийн бүс нутгийн хойд хэсэг, Орхон, Сэлэнгийн сав газраар 19-24 хэм, өдөртөө 33-38 хэм, бусад нутгаар шөнөдөө 12-19 хэм, өдөртөө 29-34 хэмийн дулаан байна.
Говийн бүс нутгаар 40 хэм гаргаад олон хоног халахаар байгааг онцгойлон анхааруулж байна” гэв.
