"World Ultra Wealth Report" Төв Азийн орнуудын баян хүмүүсийн хөрөнгийн судалгаа хийснээ тайлагнажээ. Судалгаанд бүс нутагт амьдарч буй 30 сая ам.доллараас дээш хөрөнгөтэй хүмүүсийн тоо, тэдний нийт хөрөнгийг тооцсон байна. Баян хүмүүсийнхээ тоогоор бүс нутагтаа эхний тавд Казахстан, Узбекстан, Азербайжан, Монгол, Тажикстан оржээ. Жагсаалтыг тэргүүлж байгаа Казахстан улсад 2012 оны байдлаар нийт 20 тэрбум долларын хөрөнгөтэй 120 саятан амьдарч байна. Гэхдээ энэ улсад саятны тоо өнгөрсөн онхыхоос 9,7 хувь, саятнуудын хөрөнгийн хэмжээ 20 хувь буурсан үзүүлэлттэй байгаа гэж шинжээчид тооцоолжээ.

  Харин Монгол улсад 30 сая доллараас дээш хөрөнгөтэй хүн 40 байгаа бөгөөд тэдний нийт хөрөнгийн хэмжээ 6 тэрбум ам.долларт хүрсэн гэж "World Ultra Wealth Report" мэдээллээ. Гэхдээ бүс нутгийн улсууд дотроосоо хамгийн цөөн хүн амтай нь Монгол улс юм. Хэрвээ саятныхаа тоог хүн амдаа харьцуулбал энэ жагсаалтыг аль улс тэргүүлэх нь тодорхой юм. Төв Азийн үлдсэн улсуудад 30 сая давсан хөрөнгөтэй 95 хүн байна гэж уг тайланд дурджээ. Хамгийн олон баян хүнтэй эхний таван орны 30 сая ам.доллараас давсан хөрөнгөтэй оршин суугчдын тоо, тэдний нийт хөрөнгийн хэмжээг жагсаавал:

1.    Казахстан 140 саятан, 20 тэрбум долларын хөрөнгө.
2.    Узбекстан 80 саятан, 12 тэрбум долларын хөрөнгө.
3.    Азербайжан 60 саятан, 9 тэрбум долларын хөрөнгө.
4.    Монгол 40 саятан, 6 тэрбум долларын хөрөнгө.
5.    Тажикстан 40 саятан, 6 тэрбум долларын хөрөнгө.