Ардын хувьсгалын 91 жилийн ойн баяр наадамд шөвгөрсөн 16 бөхөөс авсан сэргээшийн шинжилгээний гарч, хоёр бөхийн сорьцоос энэ төрлийн бэлдмэл илэрсэн талаар хэвлэлүүд нэг хэсэг шуугисан билээ. Сэргээш хэрэглэсэн гэх дуулианы эзэн арслан Х.Мөнхбаатар, начин Б.Сугаржаргал нар болов. Үндэсний бөхийн холбооны тэргүүн Р.Нямдорж хэвлэлийн хурал хийж эдгээр бөхчүүдийн нэрийг зарлах үеэр Х.Мөнхбаатар Р.Нямдорж нарын дундах ужгирсан хэрүүл олонд дэлгэгдсэн гэж хэлж болно.  Х.Мөнхбаатар арслан МҮБХ-ны тэргүүн Р.Нямдоржийг хүүгээ заан болгохын тулд түүнд 70 сая төгрөг амлаж байсан гэж хэлсэн. Тэрбээр “Р.Нямдорж гэдэг энэ хүн олон жил намайг нүд үзүүрлэж байсан. 2007 оны наадмаар хүү Н.Ганбаатарыгаа дэмжээд заан болгочих, 70 сая төгрөг өгье гэж байсан. Гэхдээ би татгалзсан. Намайг “Чи яасан овоо хүүхэд вэ, Чи намайг хараарай” гэж байсан гэв.  Х.Мөнхбаатар арсланг энэ явдлаас хойш олон удаа шахаж хавчиж байсан аж. 2009 онд түүнийг Г.Өсөхбаяр аваргатай барилдсан нь дүрмийн бус болсон, мөн 2011 онд долоогийн даваанд гарьд Ж.Бат-Эрдэнэтэй барилдсны дараа хөлийн цэц буруу дүгнэсэн гэж Х.Мөнхбаатар арслан өргөдөл өгч байжээ. Үүнийг нь ч Р.Нямдорж тэргүүн хүлээж аваагүй байна.  Үүнд олон жил гомдолтой явсан арслан ийнхүү “сэргээшийн хэрэг”-ээр хамаг зүйлээ ил болгосон юм. Харин энэ яриаг нь МҮБХ-ны тэргүүн Р.Нямдорж үгүйсгэж түүнийг шүүхэд өгнө гэсэн юм. Түүгээр барахгүй Р.Нямдорж энэ үеэр Х.Мөнхбаатарыг арчаагүй тэнэгээр нь дуудаж байсан. Бөхчүүд ч Х.Мөнхбаатарын талд орж дуугарч байлаа.

Тэгвэл өчигдөрхөн “Үндэсний бөхийн холбоо”-ны тэргүүн Р.Нямдорж “Х.Мөнхбаатарыг надаас уучлалт гуйхыг хүлээж байна. Тэр надтай тааралдахаараа нүд рүү эгцэлж харж чадахгүй байгаа” гэсэн ярилцлагыг хэвлэлийнхэнд өгсөн. Харин өнөөдөр Х.Мөнхбаатар Р.Нямдоржийн ярьсан зүйлийг эрс үгүйсгэж мөн хэвлэлд яриа өгсөн байна.

Тэрээр ярихдаа “Би допингийн шинжилгээний хариугаа жүдо бөхийн дэлхийн цомын тэмцээнд оролцоод ирэх замдаа албан ёсоор бичгээр авахыг хүсэхэд “Танай МҮОХ-ноос таны шинжилгээний хариуг нааш нь битгий явуулаарай. Шаардлагагүй боллоо. Баярлалаа гэсэн албан бичиг ирүүлсэн. Тиймээс одоо хариу өгөх боломжгүй. Монголын Допингийн эсрэг үндэсний төвөөс хариугаа сонсоорой” гэсэн. Монголд ирээд тус төвийн н.Баттулгаас хариугаа сонсох гэтэл ажилдаа ороогүй байна гэх шалтгаанаар одоог хүртэл ямар ч мэдээлэл өгөөгүй байна. Би ерөөсөө сэргээш хэрэглээгүй. Харин гормон өндөрсүүлэгч бодистой эм санаандгүй хэрэглэсэн нь ийм зүйлд хүргэлээ. Би өөрийн хэрэглэсэн “Чилийсэн палийсан” эмийг сэргээшийн төрөлд багтаж буй эсэхийг “Улаанбаатар Сонгдо” эмнэлгээр хянуулсан ч энэ эмнэлэгийн дүгнэлтийг харгалзаж үзэхгүй гэсэн. Тэгээд ч Р.Нямдоржийн эсрэг ярьсан бүх зүйл үндэслэлтэй. Надад түүнээс уучлалт гуйгаад байх юм болоогүй” гэсэн ярьжээ.

 Мөн тэрээр удахгүй болох гэж буй могой жилийн сар шинийн барилдаанд зодоглох бодолтой байгаа аж. Гэхдээ түүний барилдах үгүйг Улсын баяр наадам зохион байгуулах Үндэсний бөхийн салбар хороо хуралдаж шийдэх юм байна.