Төрийн соёрхолт дуучин Д.Болдын бие даасан арав дахь “Монгол поп-2” цомгийн албан ёсны нээлтийн үйл ажиллагаа өнөөдөр болж өнгөрлөө. Өнгөрсөн сарын 1-нд худалдаанд гарсан “Монгол поп-2” цомогтой зэрэгцэн ханын хуанли мөн гарсан. Энэ нь үзэгч фэнүүдийнх нь зүгээс сайн үнэлгээ аваад байгаа юм.Мөн дуучин Д.Болд "Itunest"-т “Монгол поп-2” цомгоо борлуулж эхлээд байгаа бөгөөд хоёр хоногийн өмнөөс “Монгол поп-1” дэлхийн даяар худалдаалагдаж байгаа гэнэ. Мөн удахгүй amazon.com-оор “Монгол поп-2” борлуулагдах гэж байна.
Цомгийн нээлтийн үйл ажиллагаанд дуучин Д.Болдын фэнүүд болон хэвлэл мэдээллийнхэн цугласан юм. Энэ үеэр "Монгол поп-2” цомгийг хямдралтай үнээр худалдаалсан ба Д.Болдын гарын үсэг зурах үйл ажиллагаа болов.
Мөн Д.Болд “Монгол поп-2” цомогтоо багтсан “Үүлэн домог” “Чамдаа би хайргүй байхын аргагүй” “Хүн болж төрсөн минь учиртай” “Намрын тухай миний бодол” гэсэн дөрвөн дуугаа амьд хөгжимтэйгээр дуулж сонирхууллаа. “Монгол поп” цомгуудад орсон дууг "Iphone" утастай хүмүүс үнэгүй татаж авах юм байна.
Тэрээр удахгүй “Монгол поп-2” цомогтоо зориулсан тоглолтоо хийх гэж байгаагаа дуулгаж байсан юм.
Дуучин Д.Болдтой цомгийнх нээлтийн үеэр уран бүтээлийнх нь талаар ярилцлаа.
Хүмүүс “Монгол поп” гэж яг ямар урсгал юм бэ гэж асууж сонирхдог. Та үүнд яг ямар тайлбар хийх вэ?
"Монгол поп” гэж яг юу юм бэ гэж хүмүүс асууж байгаа. Дээл өмсөхөөрөө “Монгол поп” болчихдог юм уу гэж ч бас асуудаг. “Монгол поп” гэдэг нь уламжлал дээр тогтсон шинэ цагийн рок поп хөгжмийн урсгал. Тийм учраа би Монголынхоо энэ урсгалыг дэлхий дахинд мандуулна гэсэн дотоод шартай хөдөлмөрлөж яваа. Удахгүй “Мини” тоглолт хийнэ. Ерөнхийдөө бага хэмжээний тоглолт хийж хүмүүст танилцуулбал илүү үр дүнтэй гэж бодож байгаа. Хүн болгон хөгжмийн боловсролгүй учраас бид бүхэн энгийн маягаар “Монгол поп” урсгалыг тайлбарлана.
Энэ жил “Камертон” хамтлагийн тоглолт, миний тоглолт, хөвгүүдийн шинэ хамтлагийн тоглолт болно. Ерөнхийдөө их ажилтай байгаа. Өнөөдөр “Монгол поп-2” цомог гарлаа. Энэ бол Д.Болдын урсгал биш Монгол улсын урсгал тийм учраас монголынхоо хамтлаг дуучидтай хамтран ажиллах ажил эхэлж байна. Хамгийн эхэнд хийх ажил бол Зууны манлай дуучин Б.Сарантуяа гавьяатын шинэ альбом дээр продюссерээр нь ажиллана. “Монгол поп” урсгалыг рок попынхон дэмжиж эхэллээ. Мөн “Гурван охин” хамтлагийн шинэ уран бүтээл гарна. Тус хамтлагийн шинэ цомогт нь “Монгол поп” урсгалын дуунууд орно. Мөн “Камертон-2” шоуны ялагчдын шинэ цомог гарна.
Та “R and B” цомог удахгүй гаргана гэж байсан. Яг хэзээ гарах вэ?
Удахгүй гарна. Бичлэг хийгдээд эхэлчихсэн байна.
“Монгол поп” урсгалын цаашдын загвар дизайныг яаж тодорхойлж байгаа вэ?
Энэ төслөөрөө зөвхөн хөгжим биш Монгол үндэсний дээл хувцас, эдлэл хэрэглэл, үндэсний үнэт эдлэл гэх зүйлүүдийг сурталчилах хэрэгтэй гэж бодож байгаа. Залуус маань Монголын үндэсний эдлэл хэрэглэлийг музейд байдаг хэлбэрээр нь битгий ойлгоосой гэж бодож байна. Бид ахуйдаа хэрэглэж болох зүйлүүд учраас загвар талаасаа ч нүнжиг талаасаа ч гоё байх болов уу гэж бодож байна.
“Камертон-2” шоуны ялагчид “Монгол поп” урсгалаар дуулах уу?
Яг энэ урсгалаар дуулахгүй. Би шинэ хамтлагаа поп R and B чиглэлээр дуулуулна.
Т.Энхээлээ
