АНУ-ын иргэн Жон Мартин Кийнийг хөнөөсөн 24 настай Ч.Баттуулын хэргийг Улсын дээд шүүхэд рүү харьяалал тогтоолгохоор шилжүүлжээ.
      АНУ-ын иргэн Жон Мартин Кийнийг хөнөөсөн 24 настай Ч.Баттуулын хэргийг Улсын дээд шүүхэд рүү харьяалал тогтоолгохоор шилжүүлжээ.

    Түүний хэрэгт хяналт тавьж буй хяналтын прокурор АНУ-аас нэмж тодруулах зүйл байгаа учраас Америкаас тодруулга авахаар даалгавар бичиж явуулаад байсан. Харин уг даалгаварт АНУ-аас хариу ирүүлсэн учраас хэргийг Нийслэлийн прокурор газраас хянаж дууссан байна.

    Хэрэгт сэжиглэгдэн шалгагдаж буй Ч.Баттуул одоогоор ШШГЕГ-ын харьяа цагдан хорих 461 дүгээр ангид хоригдож байгаа юм. Тэрээр хоригдоод нэг жилийн нүүрийг үзэж байгаа билээ. Хэргийн талаар Ч.Баттуул "Хэрэг мөрдөн байцаалтын шатандаа яваа учраас юу ч яримааргүй байна" хэмээн тайлбарласан юм. Гэхдээ  мөрдөн байцаалтын явцад анх мэдүүлэг өгөхдөө мөнгөнд нь шунаж, амь насыг нь хөнөөсөн хэмээн мэдүүлсэн байдаг. Харин дараахан нь “Бид дотно харьцаатай байсан. Надтай гэр бүл болохгүй гэсэн учраас өширхсөндөө түүнийг дуудаж, амийг нь хөнөөсөн” хэмээн мэдүүлж эхлээд байсан юм. Тиймээс хоёр өөр мэдүүлэг өгч байсан түүний сэтгэцийг шалгахад, хэрэг хүлээх чадвартай, эрүүл хэмээн тогтоогдсон билээ.

    Мөн түүнтэй хамт түүний дотны хоёр найзыг саатуулсан юм. Тэд “Найз маань хүн алчихлаа. Туслаач гээд гуйгаад байхаар нь цогцсыг зөөлцсөн” хэмээн мэдүүлж байсан билээ.

    Хэргийг сануулбал, өнгөрсөн оны нэгдүгээр сарын 5-ны өдөр манай улсын хилээр орж ирсэн Америк иргэн Жон Мартин ор сураггүй алга болжээ. Монголд бизнес эрхлэхээр явсан хүүгийнх нь өмнөөс Ч.Баттуул хоёр сарын турш завгүй байгаа хэмээн хариулж байсанд эх нь сэжиг авч Монгол дахь АНУ-ын элчин сайдын яамд эрэн сурвалжилж өгнө үү хэмээх хүсэлт тавьжээ. Талийгаачийн цогцсыг гуравдугаар сард Төв аймгийн Эрдэнэ сумын нутаг, Цонжин болдгийн орчмоос олсон юм. Гэмт хэрэгт сэжиглэгдсэн Ч.Баттуул “Жон Мартин Кийныг ирсэн өдрийнх нь маргааш буюу нэгдүгээр сарын 6-ны өдөр хөнөөсөн. Зургаан удаа буудсан. Түүнийг Эрдэнэ сумын нутагт аваачиж амь насыг нь бүрэлгээд хэргээ нуухын тулд цогцсыг нь булсан” хэмээн мэдүүлсэн байдаг.

    Талийгаач Жон Мартийн Кийний эхнэр хатагтай Нэнси Ли манай сайтад өнгөрсөн арваннэгдүгээр сард мэйл ирүүлсэн билээ. Тэрээр мэйлдээ “Алуурчин Ч.Баттуулд цаазаар авах ял онооно хэмээн найдаж байгаа. Харгис муухай алуурчин охины минь эцгийг хөнөөчихлөө. Манай Хятадын уламжлалд охиноо гэрлэхэд эцэг нь гарыг нь барьж явдаг уламжлал бий. Гэвч хуримын уламжлал битгий хэл нөхрийн маань охиндоо өгөх хайр халамж үгүй боллоо. Хэн үүнийг нөхөж чадах юм бэ?” хэмээн харууссан сэтгэлээ илэрхийлжээ.  

    Тайваний технологийн их сургуульд сурч байсан Ч.Баттуул багш Жон Мартин Кийнд “Шүрэн гүүр” хэмээн зочид буудал барих төлөвлөгөө үзүүлж, түүнийг монголд ирж хамтран ажиллах санал тавьсан байна. Багшдаа их хэмжээний цалин амласан тэрээр эхлээд 10 мянган долларын хөрөнгө оруулалт хийх ёстой гэжээ. Талийгаач Жон Мартин Кийн ээжээсээ арван мянган доллартай ирсэн өдрийнхөө маргааш харамсалтайгаар амиа алдсан юм.