АН-ын шинэхэн гишүүн Д.Арвин хуучин намынхан нь сэтгэл санаагаар байнга дарамтлах болсон тухай ярих болсон билээ. МАН-аас сар бүр зөвхөн түүнд зориулж ямар нэг “сюрприз” барьдаг болсон гэнэ. Харин тэрбээр АН-ыг нээлттэй, гишүүдийнхээ үгийг сонсдог гэхийн зэрэгцээ “Ардчилсан намд би сэтгэлийн хувьд их сайхан, тайван байна” гэж зарласан. Д.Арвины дээрх хариулт түүнийг яагаад АН-д оров гэсэн асуултыг намжаагаад байгаа. Үнэхээр энэ эмэгтэй МАН-ын харчуулд тэвчишгүйгээр хавчигдаад байсан ч юм шиг. Тэгвэл сүүлийн үед МАН доторх эх сурвалжууд түүнийг намаа солих болсон шалтгааныг арай өөрөөр тайлбарлаж эхэллээ. 
  АН-ын идэвхитэй гишүүн Д.Арвинг үнэхээр ардчилсан үзэл бодолдтойдоо биш АН-ынхныг ятгаж, шоронд буй нэгэн эрхмийг аврах гэж АН-д ойр байх болсон гэж ярилцах болоод байна. Тэр нь МАХН-ын дарга Н.Энхбаяр. Д.Арвин үүнийгээ батлах мэт  саяхан хэвлэлд өгсөн ярилцлагадаа “Ер нь Н.Энхбаяр даргыг явуулах, матах үйл ажиллагааг өөрийнх нь Ардын намынхан л явууласан байх гэж боддог. Энэ асуудал нэгэнт болоод өнгөрчихсөн. Гэхдээ Монгол Улсын Ерөнхийлөгч өршөөл үзүүлэх байх л гэж бодож байна” гэсэн тун сонирхолтой хариулт өгсөн байх юм. Тиймээс түүнийг АН-ыг ятгах, Н.Энхбаярыг шоронгоос суллах гэсэн зорилготой гэх яриа улам газар авчээ.

   Тэрбээр МАН-ын Мэдээлэл технологийн хэлтсийн дарга Б.Цогтгэрэлийг “уг нь сайн залуу” гэж үнэлээд батлан даалтанд гаргаж авсан. Тэгэхдээ УИХ-ын дарга З.Энхболдыг нэлээн сайн ятгасан юм билээ. Түүний хүчинд бөөрний дутагдалд ороод байсан Б.Цогтгэрэлийн биеийн байдал сайжирч байна. МАН-ын удирдлагууд дуугараагүй байхад Б.Цогтгэрэлийг тэр л гаргаж авлаа. Харин удахгүй 6,6 жилийн хорих ял сонсоод байгаа АМГ-ын дарга Ц.Батхуягт анхаарлаа хандуулах гэж байгаа гэх "бор шувуу" нисч эхлэв. Энэ юу болоод байна вэ? Овоо босгоогүй бол шаазгай юун дээр суух вэ? гэдэг. Д.Арвины сүүлийн үед хийгээд байгаа үг, үйлдэл олон хүнд хардлага төрүүлжээ. Шоронд хоригдож буй МАН-ыхныг аврах авралын элч болох гэв үү? Эсвэл АН-ын шинэхэн гишүүн ч хүчтэй гэдгээ харуулахыг хүсэв үү? МАН-ынхан дунд олон янзын тайлбар яригдаж байгаа ч Н.Энхбаярт Ерөнхийлөгч өршөөл үзүүлнэ гэсэн итгэлтэй байгаа нь түүнийг дотроо бодолтой явааг илтгээд байх шиг.