Монгол Улсын Ерөнхий прокурор, Төрийн Хууль Цаазын тэргүүн зөвлөх Д.Дорлигжав энэ сарын 5-ны өдөр Прокурорын байгууллагын хуульд заасны дагуу тушаал гаргаж, томилгоо хийсэн. Уг томилгооноос хамгийн анхаарал татсан нь Нийслэлийн прокурорын орлогч Ерөөлтийн Сагсайг томилсон томилгоо байв. Түүнийг өнгөрсөн оны долдугаар сарын 31-нд МАХН-ын дарга Н.Энхбаярын хэрэгт улсын яллагчаар оролцсоны дараа албан тушаал ахина хэмээн зарим хүн харж байсан. Мөн зарим нь гурван өдрийн турш тасралтгүй үргэлжилсэн хурлыг телевизээр харж, түүнийг нийслэлийн өмнөө барьдаг прокурор хэмээн сайшааж байв.
Гэвч байдал өөрөөр эргэж, Е.Сагсай албан тушаалаасаа буурлаа. Тодруулбал, Нийслэлийн прокурорын газрын орлогч даргаар ажиллаж байсан тэрээр энэ сарын 5-наас эхлэн Сүхбаатар дүүргийн Ерөнхий прокуророор томилогдов.
Е.Сагсайг дүүрэгт томилогдсоныг олон нийт МАХН-ын дарга Н.Энхбаярыг ялласантай холбоотой хэмээн үзэж байгаа юм. Учир нь Н.Энхбаярыг ялласнаас хойш Е.Сагсайг сайн, муу хэл ам дагах болсон. Гэвч Нийслэлийн прокурорын газрын албаны эх сурвалж Е.Сагсайг өөрөө “Дүүрэгт ажилламаар байна” гэсэн хүсэлт гаргаж, албан тушаалаа өгсөн. Нийслэлийн прокурор газар хамгийн их ачаалалтай байдаг учир нь тэрээр дүүрэгт ажиллах хүсэлт гаргасан гэлээ.
Гэхдээ Нийслэлийн прокурорын газарт тасралтгүй арван жил ажилласан түүнийг ачааллаас зугатаж, ажлаа өгсөн гэвэл хэн ч итгэмээргүй. Тэрээр Нийслэлийн прокурорын газарт найман жил хяналтын прокуророор ажиллаж, 2010 онд Нийслэлийн прокурорын орлогчоор томилогдсон билээ. Энэ хугацаанд тэрээр олны анхаарал татсан дуулиант хэргүүд, өндөр албан тушаалтнуудын хэрэгт хяналж тавьж байсан юм.
Харин түүний хянаж байсан дуулиант, өндөр албан тушаалтнуудад холбогдох хэрэгт оронд нь томилогдон ирсэн Ц.Батболд хяналт тавихаар болжээ.
Юутай ч Е.Сагсайгийн томилгоо олны анхаарлыг татсаар. Мэдээж гэнэт ийм шийдвэр гаргасанд түүнийг дарамт шахалтад орсон гэх яриа ч чих дэлсэв. Гэвч албаны эх сурвалж өөрийнхөө хүсэлтээр албан тушаалаасаа буурсан хэмээн мэдээлээд буй.
Б.Чимэг
Сэтгэгдэл (20)