Иргэний агаарын тээврийн "Изинис Эйрвэйз" компани өнөөдөр шинэ онгоцтой болжээ. Тус компанийн хоёр дахь "Бомбардир Кю-400" онгоц “Чингис Хаан” олон улсын нисэх буудалд газарджээ. Энэ онгоцыг баруун аймгууд болон уул уурхайн  чиглэлийн нислэгийн үйлчилгээндээ ашиглахаар төлөвлөсөн байна.
   "Изинис Эйрвэйз" компани өнгөрсөн оны 4-р сард Дани улсын “NAC” компанитай 2 ширхэг Бомбардир Кю-400 онгоцыг авах гэрээ байгуулсан юм байна.
 "Кю-400" онгоц нь 74 хүний суудалтай, зорчигчийн тав тухыг дээд зэргээр хангасан, ижил төрлийн онгоцнуудаас нислэгийн үеийн бүхээгийн дуу чимээ харьцангуй бага бөгөөд Кю-400 гэсэн нэрний “Кю” үсэг нь англи хэлний “Quite” буюу  “чимээгүй” гэсэн үгний товчлол юм байна. Мөн Кю-400 онгоц шатахуун зарцуулалт бага, байгаль орчинд ээлтэй гэдгээрээ бусдаас ялгардаг аж. Үүнээс гадна тус онгоц нь шороон зурваст буух чадвартай, арын болон хөндлөнгийн салхины хязгаарлалтад бага ордог бөгөөд манай орны салхи ихтэй нөхцөлд нислэг үйлдэхэд нэн тохиромжтой юм. Өнөөдөр ашиглагдаж байгаа онгоцнууд салхины хурд 5 м/сек байхад газардаж чаддаг бол Кю-400 онгоц 10 м/сек салхитай үед ч газардаж чаддагаараа илүү давуу талтай аж.