ШӨХТГ, ОССК-аас орон сууцны байрны үнийн асуудлаар өнөөдөр мэдээлэл хийлээ. Оны өмнөхөн ярьж байсан байрны үнийн хөөсрөлтөнд ШӨХТГ-аас судалгаа хийсэн байна. Судалгааны ажил дууссан тул бодит ажил болгох эхний алхам хийгдэхэд бэлэн болоод байгаа аж. Судалгаагаар Улаанбаатар хотод 1 мкв байрны үнийг нэг сая төгрөгт багтаавал компани болон иргэдэд ашигтай байх болно гэсэн тооцоог гаргасан байна.

 Орон сууцны үнийг цаашид тогтвортой байлгах үүднээс Монгол банк, Барилгын яам, ШӨХТГ-аас хяналт тавьж оролцох юм байна. Барилгын компани, Барилгын яам хоёрын хамтын ажиллагааны гэрээнд 1 мкв байрны үнийг 1 сая төгрөгөөс хэтрүүлэхгүй гэсэн заалтыг тусгаж өгч байгаа. Энэ нь эрэлтийг дэмжих бус нийлүүлэлтийг дэмжиж ажиллана гэсэн үг юм. Өөрөөр хэлбэл барилга барьж буй компаниудыг дэмжинэ. Ингэхийн тулд Төрийн банкнаас барилгын ажил гүйцэтгэгч компаниудад хөнгөлөлттэй зээл олгохоор болжээ. Хариуд нь барилгын компани байрныхаа 1 мкв-ын үнийг 1 сая төгрөгнөөс дээш гаргахгүй гэсэн үг юм.

Дэд бүтэц, газар нь үнэгүй болно 

Зайсанд баригдаж байгаа барилгыг Баянхошуунд барьж байгаа байшинтай яг ижилхэн материалаар барьж байгаа учраас одоогийн энэ үнэ бол хөөсрөлт юм. Нийслэлийн бодлого бол газрыг байраар солиход чиглэгдэж байгаа. Иргэн 00.7 га газраа байраар солино. Ингэснээр нэмж мөнгө төлөхгүйгээр байраа өөрийн болгох аж. Тэгэхэр ард иргэд газар болон байраа алдах асуудал байхгүй гэнэ. Мөн барилгын компанид газар болон хөрөнгө оруулалтыг нь асуудалгүйгээр шийдэж өгөхөөр болжээ.

Эхний байр ирэх 9 дүгээр сард ашиглалтад орно

Мкв нь 1 сая төгрөгийн үнэтэй эхний байр ирэх есөн сард ашиглалтанд орно. Тус байр нь Буянт-Ухаад баригдаж байгаа 28 ширхэг 1764 айлын орон сууц юм. Тус байрны 1 мкв-ийг  950 мянган төгрөгөөр зарах юм байна.

Тус ажил ирэх намраас үр дүнгээ өгч эхэлнэ

Хэрэгжүүлж буй хөтөлбөрийн хүрээнд 1 сая төгрөгт багтсан барилгууд баригдаад эхэлнэ. Тэгэхээр бусад барилгууд хүссэн хүсээгүй үнээ буулгана гэж ажлын хэсгийнхэн үзэж байгаа аж. Тэгэхээр тус хөтөлбөх ирэх намраас бодитой үр дүнгээ өгч эхлэх аж. Өмнөх жилүүдэд барилгын үнэнд хөөс явагдаж байсан бөгөөд одооноос энэ хөөсрөлтийг хагална, мөн ард иргэд маань энэ ажлыг үлгэр гэж бодож болохгүй гэдгийг ШӨХТГ-ын дарга О.Магнай хэвлэлийн хурлын үеэр хэлж байсан юм.


О.Магнай: Байрны МКВ нь дутуу байвал манайд номдол гаргаж болно

- Тансаг зэрэглэлийн байранд татвар ноогдуулна гэж байсан. Энэ яриа ажил хэрэг болж байгаа юу?

-  Одооноос шат дараатай арга хэмжээ авч байна. Хамгийн эхэнд бодитой өртөг хэд байгаа юм бэ гэдэгт судалгаа хийгээд дууссан. Тансаг хэрэглээтэй хүмүүс байлгүй яахав. Үүнийг манай нийгэм зөвшөөрнө. Тэр хүмүүс бусдаасаа илүү орлого олж байгаа бол илүү татвар төлөх ёстой. Өндөр зэрэглэлийн хувиар татвараа тогтоосон гадны олон орон байна. Алдарт жүжигчин Жерард Депардьё хүртэл тэр өндөр татвараас зугатаж өөр газар очсон шүү дээ. Өнөөдөр Монголд байшин хэрэгтэй гэвэл хэрэгтэй. Гэхдээ мкв нь 5000-6000 мянган долларын үнэтэй байр гэхээсээ илүүтэй хойно байгаа гэр хорооллыг богино хугацаанд барилгажуулах нь төрийн бодлогын хувьд тулгамдаж байгаа асуудал юм. Барилгын компаниудын өндөр үнэтэй байшин руу хөрөнгө оруулалт хийж байснаас илүү хямдхан барилга руу хөрөнгө оруулж сонирхлыг тийш нь чиглүүлнэ гэсэн үг. Манай өрсөлдөөний байгууллагыг дэмжих их хурлын гишүүдийн бүлэг байгаа. Энэ бүлгээр эдгээр асуудлын танилцуулгыг явуулсан байгаа. Ойрын хугацаанд татварын хуулинд өөрчлөлт оруулах хуулийг их хурлын гишүүд өргөн барих байх.

- Барилгын компаниуд ашиглагддаггүй зай талбайг мкв-д оруулж үнээ тогтоодог. Энэ асуудлыг яаж шийдэх вэ?

- Мкв дутах юм бол манай байгууллагад хандаж болно. Манайд хандах юм бол бид шийдвэрлэнэ.

- Үнэ буурахаар чанарын асуудал яригдана. Үүнд хяналтыг яаж тавих вэ?

- Барилгын яам, барилгын компани манайх гурав гэрээ байгуулж ажиллана. Манай байгууллагаас стандарт дээр нь хяналт тавьж ажиллана.