Өчигдөр 17.15 цагийн үед Нийслэлийн Мэргэжлийн хяналтын газрын дарга асан Г.Баярсайхан Монгол Улсын Шадар сайд Д.Тэрбишдагвын өрөөнд дайрч оржээ.
    Өчигдөр 17.15 цагийн үед Нийслэлийн Мэргэжлийн хяналтын газрын дарга асан Г.Баярсайхан Монгол Улсын Шадар сайд Д.Тэрбишдагвын өрөөнд дайрч оржээ. Тэрээр "Тэрбишдагва хаана байна" хэмээн хашгичин,  туслахыг нь цааш түлхэж, хүч түрэмгийлэн оронгуутаа гартаа барьж орсон савтай усаа өрөөнд цацсан гэнэ. Түүнчлэн “Д.Тэрбишдагваа би чамайг ална” хэмээн заналхийлсэн байна. Тухайн үед Д.Тэрбишдагва өрөөндөө эзгүй байсан тул хэрэг ийнхүү намжсан байна.

    Уг нь Г.Баярсайхан Шадар сайд Д.Тэрбишдагвын хүн. Тиймдээ ч энэ газрын даргаар томилохыг МХЕГ-ын даргын үүргийг түр орлон гүйцэтгэгч Д.Гүнбазарт даалгаж, томилуулж байжээ. Харин сар гаруйхны дараа тэрээр ажлаа өөрийнхөө хүсэлтээр хүлээлгэн өгсөн. Учир нь Улаанбаатар хотын захирагч Э.Бат-Үүл болон Шадар сайд Д.Тэрбишдагва хоёрын маргаанаас үүдэн Нийслэлийн мэргэжлийн хяналтын газрын ажилчдын цалин авдаг байсан цалингийн дансыг хаасан. Мэдээж хотын дарга хаасан. Энэ асуудлаас үүдэн НМХГ-ын дарга Г.Баярсайхан, “Төрийн ажлыг хэтэрхий улстөржүүлж байна. Би ямар нэгэн нам, эвслийн харьяанд байдаг хүн биш. Би бол жинхэнэ, мэргэшсэн төрийн албан хаагч. Төрийн албыг улс төртэй хутгах хэрэггүй. Тиймээс би шударга зүйлийг эрэлхийлж, энэ ажлаа өөрийн хүсэлтээр өглөө” хэмээн мэдэгдэж байв.

    Харин дараахан нь “Би ажлаа хүлээлгэж өгсөн. Үнэндээ бол өөрийн хүсэлтээр гэж байгаа ч хүмүүсийн шахалтаар гарч байх шиг байна. Манай ажилчдыг турхиран өрөөний үүдэнд суулт хийлгэсэн.  МХЕГ-ын даргын үүргийг орлон гүйцэтгэгч  Д.Гүнбазар ажлаас чөлөөлөх хүсэлт барьчихсан над дээр орж ирсэн.  Надад зориулсан бичиг гэсэн үг л дээ. Би тэр цаасыг нь шууд урсан. Гэхдээ би ухамсартай хуульч хүний хувьд цалингаа авч чадахгүйд хүрээд байгаа ажилчдаа бодоод ажлаа хүлээлгэж өгөхөөр шийдсэн. Надад дарамт шахалт үзүүлсэн гэж бодож байгаа. МАХН-ын дарга Н.Энхбаярын хэргийг хэлэлцсэн хяналтын шатны шүүхийн шийдвэртэй холбоотойгоор миний томилгоог цуцлах асуудал гэнэт яригдаж эхэлсэн. Учир нь шүүх хурлын шийдвэр гарсаны дараа МАН-ынхан болон МХЕГ-ын удирдлагууд шөнө дунд намайг дуудаж, хууль бусаар буюу хууран мэхэлж ажлаас татгалзах өргөдөл бичүүлсэн. Уг нь тэр өдөр Д.Гүнбазар эмнэлэгт хэвтэж байсан чинь намайг ажлаас огцруулах зорилгоор эмнэлгээсээ гарсан байсан. Тухайн үед Д.Тэрбишдагватай уулзаад “МХЕГ-ын дарга Д.Гүнбазар намайг хүчээр өргөдөл бичүүлсэн. Би ажлаа хүлээлгэж өгмөөргүй байна. Миний өргөдлийг хүчингүй болгож өгөөч” гэж хандсан. Гэтэл Д.Тэрбишдагва сайд шууд “Боломжгүй” гэсэн хариулт хэлсэн. Яагаад надад ингэж хандсаныг нь гайхаж л байна” хэмээн тайлбарлаж байв.

    Тиймдээ ч энэ бүхэнд Г.Баярсайхан өш санаж явсан бололтой. Хэргийн талаар Төрийн ордны хамгаалалтын албаны дарга, хурандаа Г.Лхагвасүрэн  “Бид энэ талаар ямар нэгэн мэдээлэл өгөхгүй” гэв. Харин Шадар сайд Д.Тэрбишдагва “Болсон явдлыг би мэдээгүй. Эзгүй байсан болохоор ямар ч мэдээлэл алга” гэсэн юм.

    Юутай ч Нийслэлийн мэргэжлийн хяналтын албаны даргаар сар гаруйн хугацаанд ажиллаад халагдсан Г.Баярсайхан ажлаас халагдсанаа хорсож ийнхүү Шадар сайдыг заналхийллээ. Тиймээс түүнд эрүүгийн хуульд заасны дагуу 177.1-т зааснаар бусдын амь насанд халдахыг завдсан хэргээр буюу зандалчлах гэсэн зүйл ангиар эрүүгийн хэрэг үүсгэнэ хэмээн эх сурвалж мэдээллээ. Тус зүйл ангид эрх бүхий байгууллага, албан тушаалтнаас тодорхой шийдвэр гаргуулах буюу гаргахаас татгалзуулахад шууд буюу шууд бус нөлөөлөх зорилгоор, олон нийтэд айдас төрүүлэхэд чиглэсэн нийтэд аюултай хүч хэрэглэсэн буюу хэрэглэхээр заналхийлсэн бол арваас дээш арван таван жил хүртэл хугацаагаар хорих ял шийтгэнэ хэмээн заажээ.