Харин хуралдаан дээр ямар асуудал хэлэлцсэнийг цухуйлгасан олон улсын хэвлэлүүдийн мэдээллийг хүргэе. 

    Оюутолгой компаний хувь нийлүүлэгчдийн хуралдаан хоёрдугаар сарын зургааны орой хаалттай болсон билээ. Өчигдөр энэ хуралдааны талаар Уул уурхайн сайд Д.Ганхуяг, Эдийн засгийн хөгжлийн сайд Н.Батбаяр, Байгаль орчин, ногоон хөгжлийн сайд С.Оюун, Сангийн сайд Ч.Улаан нар мэдэгдэл хийсэн. Сайдуудын мэдээлснээр хуралдаанаар зургаан үндсэн асуудлыг тодруулахыг оролдсон байна. Гэхдээ энэхүү хуралдааны хамгийн гол асуудал нь “Рио Тинто” Оюутолгой төслийг хэрэгжүүлэхэд урьдчилгаа болгон Монгол Улсын Засгийн газарт өгсөн 250 сая ам.доллараа буцаан авах шаардлагатай байгаа тухайгаа хэлсэн явдал байв.

Харин хуралдаан дээр ямар асуудал хэлэлцсэнийг цухуйлгасан олон улсын хэвлэлүүдийн мэдээллийг хүргэе. 

Bloomberg: Оюутолгойн хуралдаан ирэх сард дахин уулзах болзлоор өндөрлөв

    Хуралдаан хоёр талаас зөрчилтэй явагдлаа. Сангийн сайд Ч.Улааны мэдэгдсэнээр Оюутолгой 2012 онд ямар ч татвар төлөөгүй гэв. Оюутолгойн вэб хуудас дээр гарсан мэдээлэл ёсоор тус компани нь 2011 онд Монголын 6 дахь том татвар төлөгч болсон төдийгүй 2012 онд татвар болон Засгийн газрын төлбөрт 280 сая ам долларын төлсөн хэмээн бичсэн байна.

    Харин Рио Тинтогийн Зэсийн төсөл хариуцсан захирал Эндрью Хардинг Оюутолгойн үйл ажиллагаа төлөвлөсний дагуу явагдаж байгааг дурдсан байна. Тэрбээр “Бид өнгөрсөн долоо хоногт анхны зэсийн баяжуулалт хийсэн. 2013 оны эхний хагаст үйлдвэрлэж эхэлнэ гэсэн төлөвлөгөө хэвээр явагдана” гэж мэдээллээ. Түүний инйхүү мэдээлсэн нь илүү хувь хүссэн Монголын Засгийн газарт Рио Тинто хариу барьж Оюутолгой төслийн үйл ажиллагааг түр зогсооно гэсэн мэдээллийг үгүйсгэж байгаа юм.

Mineweb: Оюутолгойн уурхайн зардал 5,7 тэрбумаас 6,6 тэрбум болж өсчээ

    Рио Тинто Оюутолгойн уурхайг барих зардал их хэмжээгээр өсч байгаа тухай хуралдааны үеэр мэдээлсэн байна. 2010 онд төлөвлөсний дагуу тус зардалд 5,7 тэрбум ам.доллар төлөвлөсөн байсан байна. Харин одоо 16 хувиар өсч 6,6 тэрбум ам.долларт хүрчээ. Монголын Засгийн газар уурхайн зардал өссөн ч 6 тэрбум доллараас хэтэрч болохгүй гэсэн байр суурь илэрхийлжээ.

    Сангийн сайд Ч.Улаан энэ асуудалд “Монгол Улсын 2013 оны нэгдсэн төсвийн тухай хуулийн төслийг УИХ баталчихсан нөхцөлд, төсөвт суулган өгөх бололцоогүй. Тиймээс энэ асуудлыг 2014 оны улсын нэгдсэн төсөвт суулгах замаар шат дараатай өгөх бололцоог нээх ёстой. Засгийн газрын хувьд УИХ-аас зөвшөөрөл авч 250 сая ам.долларыг хүүтэй нь хамт буцаан төлөх шаардлагатай байгаа” гэсэн байр суурь илэрхийлжээ.

    Энэхүү уурхайн 66 хувийг “Turquoise Hill”-ыг эзэмшдэг  Рио Тинто, 34 хувийг Монголын Засгийн газар эзэмшдэг юм.

WSJ: Монголын тал Рио Тинто ил тод байгаагүй гэсэн асуудал тавьжээ

    Оюутолгойн хөрөнгө оруулалтын уулзалт Улаанбаатар хотноо хаалттай хуралдсан билээ. Харин хуралдааны үеэ Монголын тал хөрөнгө оруулагч Рио Тинтог үйл ажиллагааныхаа талаар ил тод мэдээлээгүй хэмээн гомдолсон талаар эх сурвалж мэдээллээ. Харин Рио Тинто Улаанбаатартай ойрхон ажилласан ч Засгийн газрын зарим ажилчид бидний энэ эрмэлзлийг олйгохгүй байна хэмээн няцаажээ.

    Рио Тинтогийн Оюутолгой төслийг хариуцсан захирал Камерон МакРэй “Бид энэ төслийн санхүүжилтэй холбоотой бүх хувьцаа эзэмшигчидтэйгээ ил тод харилцаатай байсан. Цаашид ч Монголын Засгийн газраас дэвшүүлсэн асуудлыг шийдвэрлэхийн тулд энэ байдлаа хадгалах болно” хэмээсэн байна.

    Манай сайдуудын мэдээлснээр Оюутолгойн хувьцаа эзэмшигчдийн хуралдаанаар дараах асуудлуудыг хэлэлцсэн аж. Үүнд:
1.    Монголын талд зөвлөх үйлчилгээ үзүүлсэн компанийн сонирхлын зөрчил
2.    Хөрөнгө оруулалтын гэрээний хууль, тогтоомжтой нийцэхгүй байгаа заалт
3.    Төслийн хөрөнгө оруулалтын зардлын хэтрэл болон ТЭЗҮ-ийн хэрэгжилт
4.    “Антру гоулд”-ын эзэмшилд буй тусгай зөвшөөрөл
5.    Монгол Улсын хууль тогтоомжийг хэрэгжүүлэх
6.    Менежментийн үйлчилгээний төлбөр зэргийг тодорхой болгохыг хүссэн гэжээ.

    Засгийн газар хуралдааны талаар илүү тодорхой мэдээлэл хийгээгүй байна. Ямартай ч дээрх асуудлууд яригдсаныг олон улсын хэвлэлүүд онцолжээ. Хуралдааныг ирэх сард дахин хийх аж.