Олуулаа ургийн бичгээ хөтлөх программ Apple store, ITunes store-д үнэгүй тавигдсан талаар Старсофт ХХК, Олуулаа клубыхан мэдээлэл хийлээ. Тэдний танилцуулсан энэхүү систем нь олон төрлийн цогц боломжууд бүхий гар утас болон цахим хуудсанд суурилсан програм хангамж бөгөөд ургийн бичгийн бүртгэлийг автоматжуулж, удам угсаагаа танин мэдэх, харилцаа холбоо тогтоох үйл явцыг хөнгөвчлөхөд гол зорилго нь орших аж. Старсофт ХХК нь цаашид энэхүү системээ Facebook сүлжээ шиг гэр бүлийн хүрээнд ашиглагдах sotial сүлжээ болгон хөгжүүлэхийг зорьж байгаа гэнэ.  Мөн тун удахгүй Старсофт ХХК, Олуулаа клуб хамтарч Sotial Network хэрэглэгч залуусын дунд уралдаан зарлаж тус программаар хамгийн том ургийн мод бүтээсэн ялагчийг шалгаруулж iPad, iPhone-аар шагнах аж. Ургийн бичгийн программ хангамж нь iPhone, Samsung Galaxy зэрэг iOS болон Android үйлдлийн системтэй ухаалаг гар утаснууд дээр ажиллана. Энэхүү системийн хамгийн гол давуу тал нь олуулаа нийлж ургийн бичгээ үүсгэх боломжийг олгож байгаад оршино. Орон зай байршлын ялгаатай бүсэд байгаа (УБ, Дархан, Баянхонгор) ураг төрлүүд тал талаас өөрсдийн модоо бүтээж, хамтдаа нэг том модыг бүтээх боломжтой юм байна.

Ингээд Старсофт компаний ерөнхий захирал н.Өлзий-Оршихийн сэтгэгдлийг хүргье. "Монгол түмэн бид эрт дээр үеэс өөрөөс дээш 9 үе, ураг удмын хэлхээ холбоогоо танин мэдэж, чухалчлан тэмдэглэн, ургийн бичгийг хөтөлсөөр ирсэн түүхтэй. Энэ сайхан соёл уламжлал өнөө үед мартагдаж, ургийг бичгийг хөтөлдөг айл өрх ч ховордон цөөрсөөр, цус ойртолт гэдэг аюулт үзэгдэл газар авч байна. Иймээс мэдээллийн технологийн Старсофт ХХК нь 10 жилийнхээ ойг тохиолдуулан Олуулаа клубын залуустай хамтарч Монгол хүн бүрд, айл бүрд хэрэглэгдэх энэхүү программ хангамжийг бүтээж үнэ төлбөргүй түгээн, хамаатан садан ураг төрлийн хэлхээ холбоогоо танин мэдэж, ургийн бичгийг тэмдэглэн хөтлөх уламжлалт соёлыг сэргээхийг уриалж байна" гэв.