Өнгөрсөн сарын 8-ны өдөр МАН-ын Мэдээллийн технологийн хэлтсийн дарга, Бага хурлын гишүүн Б.Цогтгэрэлийг ШШГЕГ-ын харьяа цагдан хорих 461 дүгээр ангид саатуулсан. Түүнийг 2013 оны Орон нутгийн сонгуулийн сурталчилгааны үеэр хэвлэн нийтлэх үйл ажиллагааныхаа явцад бусдыг онц ноцтой гэмт хэрэгт гүтгэсэн, эрх чөлөөнд нь санаатайгаар халдсан гэх шалтгаанаар Эрүүгийн хуулийн 111.2 хэсэгт зааснаар хэрэг үүсгэн шалгаж байгаа юм. Хэдийгээр түүнийг 14 хоногийн дараа суллана гэж байсан ч гүйцэтгэн шалгах ажиллагаа дуусаагүй хэмээн 25 хоног саатуулсны дараа батлан даалтаар гаргасан юм. Учир нь түүний биеийн байдал нь тааруухан байсан билээ. Тэрээр өдгөө “Сонгдо” эмнэлэгт хэвтэн эмчлүүлж байгаа бөгөөд өнөөдөр эмнэлгээс гарахаар болжээ.
Тэрээр гомдол гаргаад буй Н.Улаанхүү гэгч этгээдтэй эр хүний ёсоор уулзаж ярилцана гэлээ. Мөн Н.Улаанхүүтэй эвлэрүүлэх тал дээр УИХ-ын дарга З.Энхболд их туслалцаа үзүүлж буй хэмээн УИХ-ын гишүүн Д.Арвин мэдэгдсэн юм.
Энэ талаар Б.Цогтгэрэл “Зандаахүүгийн Энхболд даргыг гишүүн байхаас нь би танина. Энд тэнд тааралдвал мэнд устай. Яг адилхан мэдээллийн технологийн улсууд. Гэхдээ УИХ-ын дарга маш том улс төрч шүү. Эвлэрүүлэн зуучлах, тэр их ажилтай хүнд бол илүүц ажил юм л даа. Гэхдээ гол нь тэр хүнд хүн чанар гэж байна. Энэ залууд ингээд тус болчихъё, ирээдүйн амьдралд нь нэмэр болъё доо гэж бодож хандсан байх. Тэгээд энэ дашрамд Энхболд дарга болон миний төлөө гэсэн их олон хүнд баярлалаа гэж хэлмээр байна. Намынхандаа ч баярлалаа. Гэхдээ бас намынхнаасаа уучлалт гуйх ёстой. Ганц худаг”-т эргэж очиж амжаагүй гээд манай намынхан, найз нөхөд, Ардчилсан намынхан хүртэл ирж байна. Өчигдөр шөнө нилээн оройхон МАХН-ынхан ирлээ. Урд нь нэг намынхан байсан, хоёр тийшээ болсон гээд ямар бие биеэ танихаа байлтай биш дээ. Мөн манай жигүүр хөдөлгөөний залуучууд ч эргэж ирсэн. Бүгдээрээ эргэж тойроод, бие хаагаа асуулцаад, яахав ийхэв гээд хүн чанарын асуудал байна” гэв.
Б.Золбоо
Сэтгэгдэл (40)