Монгол Улсынхаа дөрвөн зүг, найман зовхист эх орноо батлан хамгаалах хийморьлог үйлсэд хүчин зүтгэж буй генерал, офицер, ахлагч, гэрээт, хугацаат цэргийн алба хаагчид, ажилтан албан хаагчид аа !

  Даян дэлхийн энхийн ариун үйлст Монгол Улс, монгол цэрэг, Зэвсэгт хүчнийхээ алдар нэрийг өндөрт өргөж яваа цэнхэр дуулгатан-энхийг сахиулагчид аа !

  Залуу нас, зүтгэл бүтээлээ энэ салбарт харамгүй зориулсан үе үеийн ахмад буурлууд, бэлтгэл болон чөлөөнд байгаа ахмад дайчид аа !

  Эрхэм хүндэтгэлт Та бүхэндээ ирж буй Тийн ялгуусан хэмээх усан могой жилийн хаврын тэргүүн сарын шинийн нэгний халуун мэндийг чин сэтгэлээсээ өргөн дэвшүүлье !

  Улиран одож байгаа усан луу жилд манай Батлан хамгаалах салбар, Зэвсэгт хүчин амжилт бүтээлээр дүүрэн байсныг Монголын төр засаг, иргэд, олон нийт үнэлж байгаад Батлан хамгаалахын сайдын хувьд би сэтгэл хангалуун байна.

  Удамт монгол хүмүүний хувьд нас нэмсний баяр, улирах өвлийг өнтэй давсны баяр, урин хавартай учран золгосны баяр, ургаж буй ивээлт жил гарсны баяр буюу дөрвөн их баяр давхацсан уламжлал төгөлдөр ёслол цагаан сараараа сайхан сэтгэлээ хадганд шингээж, сүү шиг ерөөлөөр биесээ баясган энх тунх, элбэг баян, дүүрэн жаргалтай, түвшин сайхан шинэлээрэй.

  Угтан золгож буй усан могой жилд улс орны маань батлан хамгаалах чадавхи улам ахиж, өргөсөн тангарагтаа үнэнч Та бүхний минь санасан бүхэн сэтгэлчлэн бүтэж аз жаргал, эрүүл энх, сайн сайхны дээдээр бялхахын өлзий дэмбэрэлтэй ерөөлийг өргөж байна.