МАХН-ын дарга Н.Энхбаяр гурван шатны шүүхээс ял сонсч, өдгөө ШШГЕГ-ын харьяа хорих 401 дүгээр ангийн нэгдсэн эмнэлэгт байгаа. Хэдийгээр тэрээр эмчилгээ хийлгэхгүй байгаа ч үзлэг шинжилгээнд хамрагдан хэвтэж байгаа юм. Түүнийг ялтан хуваариладаг журмын дагуу хуучин ганц худаг буюу ШШГЕГ-ын харьяа хорих 441 дүгээр ангид хуваариласан боловч бие нь муу гэх шалтгаанаар хорих эмнэлэгт хэвтэж байгаа юм. Эрүүл мэндийн сайд Н.Удвал түүнийг Сайд нарын гэгдэх Клиникийн хоёрдугаар эмнэлэгт шилжүүлэх тушаал гаргасан. Уг тушаалын дагуу шилжүүлэх гэсэн боловч зөвхөн Н.Энхбаярт зориулсан журам тушаал гаргалаа хэмээн гацаанд ороод байгаа билээ. Уг журам нь гацаанд орсон ч Н.Энхбаярын нэр улсын эмнэлэгт яаралтай шилжүүлэх ялтнуудын тоонд ороод байгаа юм.
Н.Энхбаяр энэ сарын 4-нд хорих эмнэлгээс ард түмэндээ зориулж, сар шинийн мэндчилгээ хүргүүлсэн. Харин өнөөдөр шинийн 1-ний өдөр тохиож, ар гэрийнхэн нь Н.Энхбаяртай уулзах, золгох гэсэн боловч уулзуулаагүй хэмээн эх сурвалж мэдээллээ.
Ийнхүү “Тийн ялгуулсан” усан могой жилийг хорих ангийн эмнэлэгт угтаж буй МАХН-ын дарга Н.Энхбаярыг ар гэрийнхэнтэй нь золгуулсангүй.
Саяхан Н.Энхбаярыг олны анхаарлыг татаад буй МИАТ-ын хэрэгтэй ч холбоотой гэсэн юм. Харин уг мэдээллийг МАХН-ын Ерөнхий нарийн бичгийн дарга Г.Шийлэгдамба үгүйссгэсэн байдаг. Тодруулбал, тэрээр “Олон нийтийн анхаарлыг татсан томоохон хэрэг буюу МИАТ-ын хэрэгт МАХН-ын дарга Н.Энхбаярыг холбогдуулах болсон байна. Энэ бол олон нийтэд Н.Энхбаяр даргын эсрэг буруу ташаа мэдээлэл өгөхийг агуулсан нь ойлгомжтой. Энэ бол үндэсгүй. “Номхон тэмээг ноолоход амар” гэдэг шиг хэрэг болгон дээр л Н.Энхбаяр даргыг хавчуулж байдаг. Ойр дотныхон хүмүүс хамаатай мэтээр ойлгуулж байдаг. Энэ нь цаанаа Н.Энхбаяр гэдэг хүнийг хэлмэгдүүлж байгааг нотолж байна гэсэн үг” гэсэн билээ.
24tsag.mn
Сэтгэгдэл (41)