Өнөөдөр "Буян арвижихуйн ерөөл" шашин урлагийн их цэнгүүн “Буянт ухаа” спорт цогцолборт болно. Энэ өдөр хийсэн буян мянга дахин арвижидаг хэмээн монголчууд эртнээс сүсэглэдэг билээ. Тиймээс уг цэнгүүнээс олсон орлогыг Эх хүүхдийн эрүүл мэндийн үндэсний төвийн мэдрэлийн тасагт хэвтэн эмчлүүлж байгаа  тархины саажилттай хүүхдүүдийн эмчилгээнд хандивлах юм байна. Цэнгүүнд усан могой жилийн бүх засал номыг Жанчивдэчин хийдийн лам нар хийх бөгөөд дуучин Д.Бурмаа, П.Жимсээ, Д.Батбаяр, "Монгол эгшиглэн" хамтлаг, "Түмэн эх" чуулга оролцож ая дуугаа өргөх юм. Мөн шашин, урлагийн цэнгүүний үзэгчдийг УДЭТ-ын урдаас таван автобус үнэ төлбөргүй "Буянт-Ухаа" спорт цогцолбор руу хүргэж үйлчлэх аж.