Өдгөө 80 жилийн түүхтэй бидний хэлж заншсанаар “Монгол кино үйлдвэр”-ийн бодлого, зохион байгуулалт, үйл ажиллагаа болон одоогийн удирдлага Ж.Солонгын талаарх мэдээлэл сүүлийн үед олны анхааралд өртөөд буй. Учир нь Ж.Солонгыг  “Монгол кино” нэгтгэлийн эзэмшил газрыг барилгын компаниудтай хуйвалдан наймаалцсан мөн тус үйлдвэрийн санхүүжилтын мөнгийг хувьдаа завшсан гэдгийг ахмад уран бүтээлчид олон нийтэд дэлгэсэн. Тиймээс ч ахмад киночид Ж.Солонгыг АТГ-т өгөн шалгуулж байгаа.

Ахмад уран бүтээлдийн хэлж буйгаар Ж.Солонго нь кино үйлдвэрийн хашаанд боссон орон сууцнаас 10 байр авахаар “Зүмбэр орд”, “Юнизм” гэх хоёр компанитай нууцаар гэрээ байгуулсан гэнэ. Ингэхдээ тэрээр 10 байрыг ажилчдадаа өгнө гэж барилгын компанынханд хэлжээ.

Гэтэл орон сууцны хороолол аль хэдийнэ босчихсон. Ажилчдад байр өгөх нь битгий хэл өдий олон жилийн хугацаанд энэ тухайгаа тэдэнд мэдэгдээгүй байна.

Түүнийг кино үйлдвэрийн газрыг барилгын компаниудад зарсанаас гадна улсын санхүүжилтээр хийгддэг "Түүхийн хүрд" баримтат киноны мөнгөнөөс хувьдаа завшдаг мөн Япон улсад болсон кино өдөрлөгийн үеэр Монголоос оролцсон 10 киноны 69400 ам.долларыг өөрийн дансанд хийсэн гэж кино уран бүтээлчид хэлж байгаа.

Энэ мэт олон хэрэг нь түүнийг АТГ-т шалгуулахад хүргэсэн. Гэтэл дээрх хэргүүд хуучраагүй байтал Ж.Солонго дахин хуудуутай ажил хийн баригдсан байна.

Сар шинийн баярын өмнө Ж.Солонго Монгол Улсын Соёлын Тэргүүний ажилтан цол тэмдгээр дөрвөн хүнийг шагнахаар болжээ. Гэвч баяр давхацсан учраас цол тэмдгийг сар шинийн дараа өгөхөөр болж хойшлуулсан байна. Харин шагнуулсан хүмүүс саяхан цол тэмдгээ авахаар ССАЖЯ-нд очтол Ж.Солонго захирлын гардуулахаар үлдээсэн үнэмлэх хуурамч болох нь батлагджээ. 

Хуурамч үнэмлэхийг хэвлэсэн цаас, сайдын гарын үсэг, бичиглэл зэрэг нь ч хуурамч болохыг тогтоосон байна. Мөн сайдын тушаал, үнэмлэхийн дугаараар нь шүүж үзэхэд өмнөх сайдын үед ч бүртгэгдээгүй байсан аж. Тиймээс энэ асуудлыг цагдаагийн байгууллагаар шалгалуулахаар болж, цол тэмдгийг нь хаанаас авсныг нь тогтоохоор болсон байна.

 Цагдаагийнхан Ж.Солонго захирал бусдад хууртагдав уу, өөрөө ийм хэрэг сэдэв үү гэдгийг нь нарийвчлан шалгах юм байна.