Орхон аймагт өнөөдрөөс эхлэн 18 нас хүрээгүй хүнд шатдаг хий худалдаалахыг хориглож байна. Уг шийдвэрийг аймгийн ИТХ-аас гаргасан бөгөөд өнөөдрөөс орон нутагт мөрдөгдөж эхлэх аж. Шатдаг хий нь аюулгүй ажиллагааны дүрэм баримтлаагүй үед хүний эрүүл мэнд, амь нас, эд хөрөнгөд өндөр эрсдэл учруулах аюултайг олон удаагийн хэрэг явдлууд харуулж байгаа. Мөн Дорноговь аймгийн есдүгээр цэцэрлэг багш нарынхаа хариуцлагыг өндөржүүлж, эцэг эхчүүдэд хүүхдүүдээ хэрхэн хүмүүжиж байгааг харах боломж олгохоор цэцэрлэгээ камержуулжээ. Эхний ээлжинд  цэцэрлэгийн зургаан ангид камер байршуулсан байна.  Ингэснээр 25 хүүхэд хүлээж авах ёстой ангийн даац хэтэрч нэг ангид 50 хүүхэд хүмүүжиж байгаа зэрэг бэрхшээлийг эцэг эхчүүдэд харуулсан байна. Цаашид камержуулалтын ажлаа үргэлжлүүлэн эцэг эхчүүд хүүхдээ хүмүүжиж байгааг интернэтээр танилцуулж байх гэнэ.