Ц.Палхаажав, Х.Цэвлээ, З.Цэрэндондог, Ц.Адъяа, Ш,Сүрэнжав зэрэг 10 гаруй МАН-ын ахмад гишүүд өнөөдөр МАХН-ын төв байранд ирж намын дэд даргатай уулзлаа. Тэд хуучин МАХН хагарч, МАН, МАХН болон салсанд хэдхэн улстөрчдийн хийсэн ухаангүй үйлдэл хэмээн дүгнэж явдагаа хэлсэн юм. Мөн цаашид эв нэгдлээ эрхэмлэн “эвт шаазгай” шиг байхыг захиж, уриалав. Түүнчлэн уг уриалгаа МАХН-ын дэд дарга Д.Тэрбишдагвад гардуулан өглөө. Уриалгад “Хоёр намын хуваагдал, хагарлыг арилгаж улс орон, ард түмнийхээ төлөө эв эеээ хичээж нэгдмэл нэг цул болохыг ахмадууд бид хүсэн хүлээж байна. хариуцлагагүй улс төрчдийн балгаар манай намд хагарал үүссэн. Үүнд намын жирийн гишүүд огт хамаагүй. Тиймээс хагарсан энэ намаа нэгтгэж цул болгоход хүн бүрийн хүчин чармайлт хэрэгтэй. “Цувж явсан барнаас цуглаж суусан шаазгай дээр” гэдэг үгийг санацгаая. Бид Ерөнхийлөгчийн сонгуульд угсаа гарал нэгтэй хоёр нам хамтран оролцох нь чухал гэдгийг та бүхэндээ уриалж байна” хэмээн бичжээ. Сүүлийн өдрүүдэд МАН, МАХН-ыг нэгдэх гэж байгаа мэтээр мэдээлж эхэлсэн. Энэ талаар МАХН-ын удирдлагууд болон Гүйцэтгэх товчооны гишүүн Г.Бямбасүрэн “МАН-тай нэгдэх асуудал яригдаагүй. Харин хамтарч ажиллах тал дээр ярилцаж болох юм. Тиймээс нэгдэхгүй” хэмээн тайлбар өгч байгаа юм.
Уриалгаа гардуулж өгсөний дараа хоёр намын ахмад гишүүд улс оронд үүсээд байгаа нөхцөл байдал болон ард түмний амьдрал ямар хүнд байгаа талаар ярилцаж санал солилцсон юм. Мөн тэд ахмад настай хүний хувьд ирээдүй хойч үеийн минь өв хөрөнгө болсон Оюутолгой, Тавантолгойг тойрсон асуудлаар ярилцлаа.
Сэтгэгдэл (10)