Олимпийн болон паралимпийн алдарт тамирчин 26 настай Оскар Писториус найз охиноо хөнөөснөө хүлээн зөвшөөрсөн талаар “CNN” онцолжээ.

  

    Олимпийн болон паралимпийн алдарт тамирчин 26 настай Оскар Писториус найз охиноо хөнөөснөө хүлээн зөвшөөрсөн талаар “CNN” онцолжээ.

    Өмнөд Африкийн алдарт тамирчны найз бүсгүй Рийва Стинкамп Валентины баярын шөнө буюу өнгөрсөн пүрэв гарагт нийслэл Претори хотноо буудуулж амиа алдсан. Хамгийн сэжигтэй нь Өмнөд Африкийн хамгийн алдартай 29 настай модель найз бүсгүй нь Писториусын гэрт хөнөөгдсөн байсан юм.

    Хэрэг явдал болсноос хоёр хоногийн дараа буюу өнгөрсөн бямба гаргаас паралимпийн аваргыг саатуулж, шалгаж эхэлсэн юм.  Харин мягмар гаргийн шүүх хуралдаанаар Оскар Писториус хэргээ хүлээж, хайрын баярын орой юу болсон талаар дэлгэрэнгүй дүрслэн ярьжээ.

Тэрбээр “Тэгэхэд шөнө дунд байсан. Би манай гэрт гадны этгээд дайран орсон байна гэж бодсон. Би хиймэл хөлөө хийгээгүй байсан учраас харанхуйд ихээхэн айдас мэдэрсэн. Тэгээд дэрэн доороосоо гар буугаа гаргаад угаалгын өрөөрүү чиглүүлж хаалга руу буудсан” гэжээ.

Оскар Писториус найз бүсгүйгээ өөрийнх нь хажуд унтаж байгаа хэмээн бодсон гэж мэдүүлжээ.

Хамгийн асуудалтай нь тэрбээр яг энэ мэдүүлгийг өгөхдөө угаалгын өрөөний хаалганы түгжээг би өшиглөж эвдэлсэн хэмээн хэлсэн байна. Харин дараахан нь  хаалгыг крикетийн цохиураар эвдэлсэн хэмээн мэдүүлсэн нь хэргийг санаатай үйлдсэн байж болзошгүй гэж сэжиглэхэд хүргэж байгаа аж.  Дараа нь дээрх хоёр аргыг дараалан ашиглаж хаалгыг эвдэн орсон тэрбээр шархадсан найз бүсгүйгээ хараад шатаар буулгаж, түргэн тусламж дуудсан гэсэн байна.

Харин прокурорууд тэр хиймэл хөлөө өмсөөд, дэрэн доороосоо буугаа авсан.  Тэгээд найз бүсгүйгээ угаалгын өрөөг түгжсэнээс эхлэн ямар нэгэн асуудлаас болж маргаан үүсч түүнийг буудсан гэж үзэж байгаагаа илэрхийлжээ.

Оскар Писториус “Би тэр орой хайрт Ривагаа өөрийнхөө гар дээр амьсгал хураахыг харахыг хүсээгүй” гэжээ.

Паралимпийн олон удаагийн аварга гүйгч баривчлагдсанаас хойш найз бүсгүйгээ хөнөөгөөгүй хэмээн мэдүүлсээр байсан билээ. Оскар Писториус өмнө нь “Тэр орой найзуудтайгаа хоол идчихээд гэртээ харьсан. Риватай телевиз үзчихээд иогийн дасгал хийсэн. Бид орондоо орсноос хэдэн цагийн дараа би угаалгын өрөөнд чимээ гарахыг сонссон” хэмээн мэдүүлж байсан юм. Тэрбээр найз бүсгүйгээ хөнөөснөө эрс няцааж, ойрын таван чухал гүйлтийн тэмцээнд эх орноо төлөөлөн оролцохгүй гэдгээ мэдээлж, эсэргүүцлээ илэрхийлж байсан. 

Өчигдрийн сонсгол хурал ямар нэгэн дүгнэлт гаргалгүй өндөрлөсөн байна. Дараагийн сонсгол хурлыг орон нутгийн цагаар лхагва гаргийн өглөө хийхээр төлөвлөжээ.

Оскар Писториус нь паралимийн рекордыг олон удаа эвдэж, гүйлтийн 6 алт, нэг мөнгө, нэг хүрэл медаль зүүсэн хамгийн өндөр амжилттай тамирчин билээ. Хиймэл хөлтэй хэдий ч олимпийн гүйлтийн төрөлд амжилт нь тэнцэж уралдаад нэлээд урдуур барианд орсноор Оскар Писториус дэлхийд тэсвэр тэвчээрээ гайхуулж байсан юм.