МИАТ-ын дотор бугшсан авлигын хэрэг ил болж, улсын олон тэрбум төгрөгийг хувьдаа завшсан гэх хүмүүс саатуулагдан шалгагдаж байгаа билээ. Он гарсаар хамгийн том, хамгийн их нууцтай энэ хэрэг олон нийтийн анхаарлын төвд байсаар байна. Энэ хэрэгт “Монголиан Эйрлайнес" компанийн эзэн Ч.Хоролсүрэн, түүний төрсөн дүү Ч.Суурьтогтох, Н.Гантөмөр, МИАТ ХК-ийн гүйцэтгэх захирлын албан тушаалыг хашиж байсан гавьяат нисгэгч Р.Бат-Эрдэнэ, Б.Эрдэнэбилэг, Ц.Орхон болон түүний эхнэр Ү.Цэцэгмаа, Төрийн өмчийн хороонд ажиллаж байсан С.Батхишиг, МИАТ-ын захирал асан Б.Эрдэнэбилэгийн төрсөн дүү Б.Мандахбаяр нарын есөн хүнийг баривчлан цагдан хориод байгаа билээ. Тэгвэл  өөр хэд хэдэн гишүүнийг мөн холбогдуулан шалгаж байгаа гэх мэдээллийг Нийслэлийн прокурорын газраас өгөөд байна. Чухам хэн хэн энэ жагсаалтад багтаж байгааг тэд дэлгээгүй ч эх сурвалжууд МИАТ-ын хэрэгт холбогдоод байгаа УИХ-ын гишүүдийг нэг нэгээр нь нэрлэж эхлээд байна.
 
  Энэ хэрэгт хамгийн түрүүнд МАН-ын залуу гишүүн, “МАК”-ын Н.Номтойбаяр шалгуулах болсон гэж эх сурвалж мэдээлэв. Учир нь мөнгө угаахад ашигласан гэх “Монголиан Эйрлайнес" компанийг анх байгуулахад тэрбээр хувьцаа эзэмшигч “МАК” компанийн өмнөөс тууз хайчилж байжээ. МИАТ-ын ноёнтнууд “Монголиан Эйрлайнес"-аар дамжуулан  яг мөнгө угааж эхэлсэн гэх тэр он цагт Н.Номтойбаяр дэд захирлаар нь ажиллаж байв. Хувьцаа эзэмшдэг компанид нь ийм их хэмжээний мөнгө угааж байхад түүнийг мэдээгүй, сэжиг төрж байгаагүй гэхэд гайхах хүн олон. Тэрбээр энэ хэрэгт гар бие оролцоогүй байлаа ч хувь эзэмшигч байсан гэдэг утгаараа шалгуулах нь гарцаагүй болжээ. Харин түүний дараа бичигдэх хүн нь Хууль зүйн сайд асан Ц.Нямдорж. Үүнийг эх сурвалжууд баталж чадахгүй байгаа ч тэрбээр хэргийг мэдсээр байж нуун дарагдуулсан хэрэгт холбогдож магадгүй болоод байгаа. Учир нь одоогийн Зам тээврийн сайд А.Гансүх тухайн үед МИАТ-д сэжигтэй үйлдэл гараад байгаа талаар мэдээлж байжээ. Гэсэн ч хуулийнхан үүнийг шалгаагүй, Х.Тэмүүжингийн үед илэрч байна. Тиймээс түүнийг хэргийг нуун дарагдуулсан гэж шалгуулахад ойрхон байгаа гэж эх сурвалж хэллээ. Эс бөгөөс Ц.Нямдорж хууль бус үйлдлийг мэдээлсээр байхад ажилдаа хариуцлагагүй хандсан болж таарна.
     Мөн МИАТ-ын хэрэг ҮХААЯ-ны сайд Х.Баттулгын нэр яригдсаар байна. Түүнийг “Монголиан Эйрлайнес"-д хувь эзэмшдэггүй гэж Зам тээврийн сайд А.Гансүх мэдэгдсэн. Тийм байлаа ч Х.Баттулга “Монголиан Эйрлайнес”-д орон нутагт нисэх зөвшөөрөл өгч, тууз хайчилж байсан, “Монголиан Эйрлайнес” гэж ямар компани вэ гэдгийг хэнээс ч сайн мэдэх хүн. МИАТ-ын экс дарга нарын мөнгө угаасан хэрэгт эдгээр эрхмүүд шалгагдаж байж магадгүй юм. Мөн л “Монголиан Эйрлайнес”-д хувьцаа эзэмшдэг “Бодь групп”-ын УИХ-д суудаг төлөөллүүд энэ хэрэгт холбоотой гэж зарим хэвлэлүүд бичиж байгаа ч тэдний зүгээс албан ёсоор үгүйсгэж байгаа юм.