"ЭРҮҮЛ МОНГОЛ ХҮН – ШИНЭЧИЛЖ ШИЙДЬЕ 222” уулзалт өчигдөр ЭМШУИС дээр болж Ерөнхий сайд Н.Алтанхуяг, Эрүүл мэндийн сайд Н.Удвал, Эрүүл мэндийн дэд сайд Ж.Амарсанаа болон холбогдох албаны хүмүүс оролцов. Уулзалтын эхэнд Ерөнхий сайд Н.Алтанхуяг эрүүл мэндийн салбарт ажиллах үед гарч байсан асуудлуудыг хэрхэн шийдвэрлэх талаар болон эмнэлгийн тусламж, үйлчилгээг иргэн рүү хэрхэн ойртуулах талаар хэд хэдэн сэдвээр хөндөн ярьж, эрүүл мэндийн салбарт хийх шинэчлэлийн үндсэн зарчмаа танилцууллаа. Тухайлбал, Эрүүл мэндийн салбарын тогтолцоо буруу байгаа нь өрхийн эмнэлгээсээ анхан шатны тусламж авдаг иргэдийн тоо цөөн, хоёр, гуравдугаар шатлалын эмнэлгийн ачаалал хэт өндөр байгаагаас харагдаж байгаа юм. Өрхийн эмнэлэг чадваржвал хоёр, гуравдугаар шатлалын эмнэлэг жинхэнэ утгаараа ажиллаж, Солонгос, Хятад, Тайванийг зорьж эмчлүүлдэг иргэдийн тоо цөөрнө. Тиймээс уруугаа харсан энэхүү гурвалжин тогтолцоог өөрчилж, өрхийн эмнэлгийн үйлчилгээний төрлийг нэмэгдүүлж, үйл ажиллагааг нь бэхжүүлнэ гэдгээ тэрбээр хэлсэн.
Түүнчлэн Засгийн газар үзлэг, оношилгоонд ихээхэн анхааран ажиллахаа хэлээд буй. Аймгийн Нэгдсэн эмнэлгүүдийг түшиглэсэн оношилгооны төв байгуулахад Ерөнхий сайдын төсвийн багцаас 20 гаруй тэрбум төгрөг зарцуулахаар төлөвлөсөн талаар Засгийн газрын тэргүүн тодотгон хэлсэн юм. Нийгмийн эрүүл мэндийн үйчилгээнд хоосон лоозон, уриа хэлэхгүй. Эхийн хэвлийд, хүүхэд байхаас нь анхаарал тавина. Тиймээс ч оношилгооны төвүүд байгуулахаар Шинэчлэлийн Засгийн газар ажиллаж байгаа. Хүүхэд залуусыг бааранд биш спорт зааланд цагаа өнгөрөөдөг болох орчин нөхцлийг нь бий болгож өгөхөд анхааран ажиллахаа Ерөнхий сайд Н.Алтанхуяг хэлээд эдгээр төлөвлөгөөний талаарх салбарынхны саналыг сонсов.
Эрүүл мэндийн сайд Н.Удвал ярианыхаа эхэнд Монгол Улсын Шинэчлэлийн Засгийн газрын тэргүүн, Ерөнхий сайд Н.Алтанхуягийг зөвлөх багийнхаа хамтаар эрүүл мэндийн салбарт ажиллаж, салбарын хүнд асуудлыг ой тоондоо ортол ойлгосон явдал бол тус салбарын өөдлөн дэвжихийн эхлэл болно хэмээн салбарын хамт олон бэлгэшээж буйг хэлээд салбарынхаа нийт эрдэмтэн, эмч, ажилчдын өмнөөс Ерөнхий сайдад талархал илэрхийллээ.
Тэрбээр эрүүл мэндийн салбарын шинэчлэлийг суурь шинэчлэл, эрчимтэй шинэчлэл, иж бүрэн шинэчлэл гэсэн гурван үе шаттайгаар хэрэгжүүлж байгаагаа хэлээд Шинэчлэлийн Засгийн газрын мөрийн хөтөлбөрийн “Эрүүл чийрэг Монгол хүн” бүрэлдэхүүн хэсгийн хүрээнд хийгдэж буй суурь шинэчлэлийн ажлыг танилцуулав.
Эрүүл мэндийг тодорхойлогч олон хүчин зүйл байдгийн 10 хувь нь эрүүл мэндийн тогтолцоо, тэнд ажиллаж буй эмч, мэргэжилтнүүд, хэрэглэж буй багаж, тоног төхөөрөмж, арга зүйтэй холбоотой байдаг, 55 хувь нь хувь хүний зан үйл, эрүүл мэндийн мэдлэг, эрүүл мэндийн тусламжийг ашиглах зан үйлээс шууд хамааралтай, харин үлдсэн 35 хувь нь бусад салбараас хамаардаг гэдгийг Сайд хэлээд иргэдийн эрүүл мэндийн боловсролыг дээшлүүлж, иргэдийн тусламж, үйлчилгээг ашигладаг байхад чиглүүлэх хэрэгтэй байгааг цохон хэлсэн юм.
Хэлэлцүүлэгт 30 гаруй эмч, ажилтнууд санал хэллээ. Ажлын гүйцэтгэлээр цалинжуулдаг болох, ЭМШУИС-ийн дэргэд сургалтын эмнэлэг байгуулах, өрхийн эмч нарыг чадваржуулах, аймгийн төвүүдэд оношилгооны төв байгуулах, урьдчилан сэргийлэх ажил буюу нийгмийн эрүүл мэндэд анхаарах, мөн сэтгүүлчид эрүүл мэндийн салбарт гарч буй алдааг хэтэрхий дэвэргэж байна, сайн сайхан, амжилттай хийгдэж хүний амийг аварч буй олон мянган ажлыг харуулдаггүй гэдэгтэй тэд санал нийлж байлаа.
