Луу жилийн хамгийн барцадтай салбараар эрүүл мэндийн салбарыг тодруулж болно. Тус салбарт шил шилээ даран гарсан эмгэнэлт хэргүүд нь эмч, эмнэлэгийн ажилтан нарын ажилдаа хэрхэн хэнэггүй, хариуцлаггүй ханддагийг ил болгосон.

Тухайлбал дөнгөж төрөөд сувилагчийн “гарт” түлэгдсэн нярай охин, намын харъяаллаас болж сумын эмчид үзүүлэх эрхээ хасуулж хорвоог орхисон сар гаруйхантай нярайд тохиолдсон эмгэнэлт явдал мөн кесарева хагалгаагаар төрсөн Э.Хонгорзул гэх эмэгтэйн гэдсэнд хоёр метр шахуу урт самбай хийж орхин бүсгүйг эрүүл мэндээр нь хохироосон гэх мэт үйлдлүүд нь өнгөрсөн онд энэ салбарынхныг хэрхэн “амжилттай” ажилласныг харуулж байгаа юм. Дээрх хэргүүд дор бүрнээ шүүх, хуулийн байгууллагын шатанд шалгагдаж яваа.

Тэгвэл энэ сарын 19-ны өдөр Дархан-Уул аймгийн төрөх эмнэлэгийн тасагт 27 настай Г эмэгтэй амаржихаар очсон ч хүүхдээ өөрөө эх барьж авсан байна. Энэ нь бүсгүйн анхны төрөлт байжээ. Түүнийг эмнэлэгт амаржихаар ирэхэд эмч, эх баригч нараас нэг нь ч анхаараагүй байна. Арга ядсан бүсгүй 17 цаг 40 минутад хүлээлгийн өрөөнд амаржиж  3,5 кг хүүтэй болсон байна.

Г бүсгүйн хувьд харж хандах хүнгүй тул аймгийн хүүхэд гэр бүлийн хөгжлийн хэлтсийн хяналтад жирэмсний таван сартайгаасаа оржээ. Жирэмсний хяналтанд орсон цагаас хойш түүнд тус байгууллагын нийгмийн ажилтан байнгын хяналт тавьж  төрөх үеэр нь хамт байсан байна.  Г бүсгүй нийгмийн ажилтанд хэлэхдээ “Эх барих хүн байхгүй учраас хүүгээ газар унагаасан” гэжээ.

 Дархан-Уул аймгийн төрөх тасаг нь 20 эх баригчтай бөгөөд нэг ээлжинд 4 эх баригч ээлжилдэг гэнэ. Тус эмнэлэгийн эмч нар Г бүсгүйг хүлээлгийн өрөөнд төрснийг хүлээн зөвшөөрсөн бөгөөд үүнийгээ төрөх тасгийн ачаалалтай холбон тайлбарлаж байгаа. Харин бүсгүйг харж хандах хүнгүй гэдгээр дээрэлхэн ийм үйлдэл хийгээгүй гэдгийг тэд хэлж байгаа юм. Ямартай ч эх хүүхдийн биеийн байдал одоогийн байдлаар сайн байгаа аж.