Монгол улсын иргэн Т.Аятунгаа ээж Б.Солонгынхоо хамт Интерполоор эрэн сурвалжлагдаж байгаа. Тэднийг хүүхдийн эсрэг гэмт хэрэг үйлдсэн хэмээн эрэн сурвалжилж байгаа юм.
    Монгол улсын иргэн Т.Аятунгаа ээж Б.Солонгынхоо хамт Интерполоор эрэн сурвалжлагдаж байгаа. Тэднийг хүүхдийн эсрэг гэмт хэрэг үйлдсэн хэмээн эрэн сурвалжилж байгаа юм. Харин Т.Аятунгаа өнгөрсөн лхагва гаригт мэдээлэл хийж, “Би Интерполоор эрэн сурвалжлагдах ёсгүй. Би харин ч хохирогчоор тогтоогдсон. Би хүүхдээ эцэгт нь алдсан эх хүн” хэмээн мэдэгдсэн билээ.

    Тодруулбал, тэрээр 2011 оны долдугаар сард Олон улсын иргэншилтэй Чарльз Эргэнтэй танилцаж, гэр бүл болжээ. Улмаар охинтой болж, Филиппинд очиж амьдарсан байна. Гэвч өнгөрсөн оны арваннэгдүгээр сарын 5-нд нөхөр нь охиноо аваад гараад тэр чигтээ ирээгүй аж. Тухайн үед охин нь таван сартай байсан бол одоо есөн сартай юм байна. Охиноо алдсан даруйдаа Т.Аятунгаа тус улсын хуулийн байгууллагад хандсан боловч охиноо олж чадалгүй визний хугацаа дууссанаар монголдоо ирсэн аж.

    Болсон явдлын талаар тэрээр ийм мэдээлэл өгсөн юм.

    Харин Филиппин улсаас Гадаад харилцааны яаманд өөр мэдээлэл өгөөд буй. Тодруулбал, түүний нөхөр Чарльз Эргэн Т.Аятунгааг “хүүхэдтэйгээ ёс бус харьцсан. Аюул учруулахыг завдсан” хэмээн хуулийн байгууллагаар шалгуулж байжээ. Энэ хэрэг нь тус улсын шүүхээр шийдэгдэж байсан талаар албан ёсны мэдээлэл хүргүүлсэн байна. Гэвч холбогдох байгууллагаас шүүх хурлын шийдвэрийн талаар мэдээлэл өгөхгүй байгаа юм.

    Албан бус эх сурвалжуудын мэдээлснээр, түүнийг нөхрөөсөө их хэмжээний мөнгө нэхсэн гэдэг. Улмаар мөнгөө өгөхгүй болохоор нь хүүхдээ барьцаалж, мөнгө нэхсэн нь ийнхүү шүүхийн хаалга татахад хүргэсэн гэв. Тиймээс ийнхүү Интерполоор хүүхдийн эсрэг гэмт хэрэг үйлдсэн хэмээн эрэн сурвалжилж эхлээд байгаа аж.

    Юутай ч манай улсын зүгээс түүний хүүхдийг олох ажилд анхаарлаа хандуулан, холбогдох Элчин сайдын яам, Консулын газарт хандаад байгаа юм байна.

    Харин эрэн сурвалжлагдаж буй Т.Аятунгаагийн хувьд түүнийг Интерполоор эрэн сурвалжлагдаж байгаа ч Монгол улсын Үндсэн хуулийн II бүлгийн Хүний эрх, эрх чөлөөний бүлэгт зааснаар өөрийн орны иргэдээ гадаад оронд Эрүүгийн хуулиар шийтгүүлэх, эрүүгийн хариуцлага хүлээлгэхийг хориглодог юм байна. Мөн сурвалжлагдаж байгаа, эрүүгийн хариуцлага хүлээлгэхээр гэмт хэрэг үйлдсэн нөхцөлд манай улс иргэнээ барьж өгөөд гадаад улсад шийтгүүлэхээр өгөх хууль, эрх зүйн үндэс байхгүй аж.

    Мөн манай улсын зүгээс Филиппин улсын хуулийн байгууллагад хүсэлт гаргаснаар түүнийг нөхөр Чарльз Эргэнийг Филиппиний хилээр гарахыг хориглоод байгаа юм.