2009 онд нэг хүний аминд, 2011 онд гурван хүний аминд хүрсэн “Рецетив” гэмт хэрэгтэн Б.Эрдэнэбилэгийн хэрэг юу болов. Түүнийг дөрвөн хүний амь насанд хүрсэн хэмээн гурван шатны шүүхээс цаазын ял оноосон. Түүний дараа Улсын дээд шүүхийн нийт шүүгчдийн хуралдаанаар орж, цаазын ялыг мөн хэвээр баталсан юм. Тиймээс түүнд Ерөнхийлөгчөөс уучлал хүсэх ганцхан зам үлдээд байсан билээ. Гэвч тэрээр өөрөө Ерөнхийлөгчөөс уучлал хүсэхгүй гэдгээ өмгөөлөгчөөрөө дамжуулан мэдэгдэж байсан юм. Учир нь тэрээр Төрийн тэргүүнээс уучлал хүссэн ч нааштай хариу авахгүй хүмүүсийн тоонд өөрийгөө зүй ёсоор орно гэсэн юм. Тиймдээ ч Ерөнхийлөгчөөс уучлал хүсээгүй. Түүний хэргийг гурван шатны шүүх өнгөрсөн оны оны дөрөвдүгээр сард эцэслэн шийдсэн. Шийдээд жил гаруй хугацаа өнгөрчээ. Тэгэхээр нэгэнт Ерөнхийлөгчөөс уучлал хүсээгүй цаазын ял сонссон Б.Эрдэнэбилэгийн хэрэг юу болов. Манай улс цаазын ялгүй орон болсоноо тунхагласнаас хойш цаазын ял гүйцэтгэхгүй байгаа гэдэг. Тэгэхээр Б.Эрдэнэбилэг одоо хаана хэдэн жилийн хугацаатай ял эдэлж байгаа, эсвэл түүний цаазын ялыг гүйцэтгэсэн үү гэдэг нь анхаарал татаж байгаа юм.
Түүний хэргийн талаар Улсын дээд шүүхийн албаны эх сурвалжаас тодруулахад "Манайх хэргийг нь шийдсэн учраас одоо манайд түүний хэрэг байхгүй" гэсэн юм.
Хөвсгөл аймагт найман настай хүчирхийлж, амь насыг нь хөнөөсөн Н.Мөнх-Оргилын хувьд цаазын ял сонссон ч Ерөнхийлөгчөөс уучлал хүссэнээр ял нь 30 болон өөрчлөгдсөн билээ. Тиймээс тэрээр гянданд ялаа эдэлж байгаа юм. Харин Б.Эрдэнэбилэг???
Түүний үйлдсэн хэргийг сануулбал, Б.Эрдэнэбилэг нь 2009 онд гурван найзын хамт архи уусан байдаг. Улмаар хоорондоо маргалдаж, зодолдсон учир Б.Эрдэнэбилэг найз залуусаа хүлж орхижээ. Гэтэл тэдний нэг нь болох М боомилогдож нас барсан байна. Мөн тэрээр нас барсан М-ийн гэрт очиж, дүүг нь зодон танхайрч, ээжийг нь хүчирхийлсэн хэрэг үйлдсэн билээ. Уг хэрэгт нь Баянгол дүүргийн шүүхээс түүнд 23 жилийн ял оноосон ч тэрбээр давж заалдсан. Түүнийг хүний амь насыг санаатайгаар, эсвэл санамсаргүйгээр хүний амь хөнөөсөн үү гэдгийг шат, шатны шүүхээр шийдэгдэлгүй явсаар дахин гурван хүний аминд хүрэх нөхцөл бүрдсэн аж. Учир нь уг хэргийн шүүх хурал 2011 оны наймдугаар сарын 26-нд болох байсан ч өмгөөлөгч ирээгүй шалтгаанаар хойшилсон юм. Харин тус өдөр Б.Эрдэнэбилэг нь Баянзүрх дүүрэгт оршин суух өөрийн найз охин Д-г аав ээжийнх нь хамт хөнөөсөн билээ.
Б.Чимэг
Сэтгэгдэл (9)