Олимпийн бэлэг тэмдэг болсон Оскар Писториус найз бүсгүйгээ хөнөөсөн хэргээ хүлээж буруутгагдсан талаар манай сайт мэдээлсэн билээ. Тэгвэл дэлхий нийтийг шуугиулсан нэгэн мэдээлэл цацагдсан нь Писториусын ах ч мөн аллагын хэрэгт буруутгагджээ.

Эхлээд ах нь

    Карл Писториус 2010 онд амиа алдсан эмэгтэй мотоцикльчныг хөнөөсөн байна. Писториус яг тэгж мэдэгдсэнтэй адил ах нь бас санамсаргүй байдлаар эмэгтэйн амийг хөнөөсөн гэж мэдүүлжээ.

Карл писториус гурван жилийн өмнө Өмнөд Африкийн Вандербижл паркад жолоо барьж яваад мотоцикль унаж явсан эмэгтэйг дайран осолдсон байна. Эмэгтэй ослоор эмнэлэгт хүргэгдэж хоёр өдрийн дараа нас барсан аж.

Гэр бүлийн өмгөөлөгчийн мэдэгдэж буйгаар “Карл тэр үед машинаа тун болгоомжгүй барьсандаа ихэд харамсаж байгаа. Цагдаагийн шинжилгээгээр ч түүнийг осол гарах үед согтууруулах ундаа хэрэглэсэн гэж гараагүй. Тэр санамсаргүйгээр эмэгтэйг мөргөсөн” хэмээн мэдэгджээ.

Карл Писториусыг ирэх пүрэв гарагт дүү Оскар Писториусын сонсгол хуралдааны дундуур шүүхээр болжээ.

Дараа нь дүү нь

   Өмнөд Африкийн алдарт тамирчны модель найз бүсгүй Рийва Стинкамп Валентины баярын шөнө түүний гэрт буудуулж амиа алдсан. Олимпийн болон паралимпийн алдарт тамирчин 26 настай Оскар Писториус найз охиноо хөнөөснөө хүлээн зөвшөөрсөн юм.

Тэрбээр “Тэгэхэд шөнө дунд байсан. Би манай гэрт гадны этгээд дайран орсон байна гэж бодсон. Би хиймэл хөлөө хийгээгүй байсан учраас харанхуйд ихээхэн айдас мэдэрсэн. Тэгээд дэрэн доороосоо гар буугаа гаргаад угаалгын өрөөрүү чиглүүлж хаалга руу буудсан” гэж мэдүүлсэн юм. 

Паралимпийн олон удаагийн аварга гүйгч баривчлагдсанаас хойш найз бүсгүйгээ хөнөөгөөгүй хэмээн мэдүүлсээр байсан билээ. Оскар Писториус өмнө нь “Тэр орой найзуудтайгаа хоол идчихээд гэртээ харьсан. Риватай телевиз үзчихээд иогийн дасгал хийсэн. Бид орондоо орсноос хэдэн цагийн дараа би угаалгын өрөөнд чимээ гарахыг сонссон” хэмээн мэдүүлж байсан юм. Тэрбээр найз бүсгүйгээ хөнөөснөө эрс няцааж, ойрын таван чухал гүйлтийн тэмцээнд эх орноо төлөөлөн оролцохгүй гэдгээ мэдээлж, эсэргүүцлээ илэрхийлж байсан. 

Оскар Писториус нь паралимийн рекордыг олон удаа эвдэж, гүйлтийн 6 алт, нэг мөнгө, нэг хүрэл медаль зүүсэн хамгийн өндөр амжилттай тамирчин билээ. Хиймэл хөлтэй хэдий ч олимпийн гүйлтийн төрөлд амжилт нь тэнцэж уралдаад нэлээд урдуур барианд орсноор Оскар Писториус дэлхийд тэсвэр тэвчээрээ гайхуулж байсан юм.

Өмнөд Африкийн ах дүү хоёр ингэж эмэгтэчүүдийн аминд хүрсэн аж. Карлын хэргийг ирэх сарын сүүл гэхэд, Писториусын хэргийг зургаадугаар сарын эхэн гэхэд эцэслэн шийдвэрлэхээр болоод байна.