Нийслэлийн удирдлагын зөвлөлийн хурлаар сонгон шалгаруулалтын журмыг шинэчлэн баталсан билээ. Нийслэлийн төрийн өмчийн сургууль, цэцэрлэгүүдийн захирал, эрхлэгчдийг сонгон шалгаруулах журам өмнө нь байсан ч хэрэгжилт нь хангалтгүй байжээ. Тухайлбал, өнгөрсөн хугацаанд 64 сургууль, цэцэрлэгийн удирдлага сонгон шалгаруулалтгүй өөрөөр хэлбэл хууль зөрчиж томилогдсон тоо байдаг байна. Мөн нийслэийн Боловсролын газраас сул ажлын байранд сонгон шалгаруулалт явуулдаг ч тодруулсан хүмүүсийг томилдоггүй. Түүнчлэн сул ажлын байр гарахад Дүүргийн засаг дарга, захирал, эрхлэгчид ажлын байрны захиалгаа нийслэлийн Боловсролын газарт өгдөггүй байжээ. Тэгвэл Боловсролын тухай хууль шинэчлэгдэж  Нийслэлийн засаг дарга сургууль цэцэрлэгийн эрхлэгчдийг томилдог болсон нь сонгон шалгаруулалт явуулах нөхцөл шалтгааныг бүрдүүлээд байгаа юм.

Энэхүү шалгаруулалтын хүрээнд одоогоор 27 сургуулийн захирал, 64 цэцэрлэгийн эрхлэгчдийг ажлаас нь чөлөөлөх болчихоод байгаа аж.

Эхний ээлжинд Төрийн өмчийн 122 Ерөнхий боловсролын сургууль, 190 цэцэрлэгүүдийн хууль зөрчиж томилогдсон захирлуудыг солих юм байна. Мөн 60 ба түүнээс дээш настай тэтгэвэртээ гарч байгаа сургууль цэцэрлэгийн захирал, эрхлэгчдийн ажлын байранд шинээр хүн томилохоор болжээ. Тэгэхээр сонгон шалгаруулалтгүйгээр гарч ирсэн захирал удирдлагууд хийгээд тэтгэврийн нас нь болчихсон ч дараагийн хүмүүстээ халаагаа өгдөггүй ахмадуудыг албан тушаалаас нь буулгах юм.

Цаашдаа Боловсролын тухай шинэ хуулиар боловсролын байгууллагад аттестачлал явуулах аж. Мөн Авлигатай тэмцэх газарт өмнө нь шалгагдаж байсан, одоо шалгагдаж байгаа удирдлагуудад арга хэмжээ авч хариуцлага тооцох гэнэ. Энэ мэт хууль бус зүйлийг халж байгаа нь үнэхээр сайшаалтай юм. Дашрамд дуулгахад сургууль, цэцэрлэгийн захирлыг сонгоход эцэг эхчүүдээс ч санал авч байхаар тогтжээ.

Таны хүүхдийн цэцэрлэг, сургуулийн захирал, эрхлэгч ямар хүмүүс байдаг вэ?. Ажлаа сайн хийж чаддаг уу?. Одоо энэхүү ажлын байр сонгон шалгаруулалтын журмаар олгогдох болно.Үүнийг дэмжих үү гэх мэтээр эл асуудлын хүрээнд цэцэрлэгийн хүүхэдтэй, дунд ангийн хүүхэдтэй, өөрөө суралцдаг гурван хүний төлөөлөлтэй ярилцахад:

Иргэн Б.Наранжав: Захирал, эрхлэгчүүдийг сонгохдоо эцэг, эхийн саналыг сонсоно гэдэг маш зөв.
Зарим нэг сургуульд олон жил ажилласан хэрнээ хүүхэд хүмүүжүүлэх наад захын  харилцаа, сурган хүмүүжүүлэх барил байхгүй байна.  Тэдний үйлдэл нь хүртэл балмад байдаг. Жишээ дурьдахад миний дүүгийн хүүхдийг ангийнх нь багш тультраа хэлтэй гэж хэлснээс болж хүүхдүүд шоолдог болсон байгаа.  Энэ мэтээр хүүхдийг царай зүсээр нь доромжилдог багш хүн байж болох уу?. Тэгээд болоогүй  хүүхдэд багш нарын баяраар маргааш заавал бэлэг авчраарай гэсэн байгаа юм. Иймэрхүү ёсзүйн асуудлыг судалж үзээд эцэг эхтэй нь ярилцаж шийдвэрлэвэл хэрэгтэй байна. Захирал, эрхлэгчүүдийг сонгохдоо эцэг, эхийн саналыг сонсоно гэдэг маш зөв зүйл юм.

Иргэн Б.Өнөрцэцэг: Цэцэрлэг, сургуулийн  удирдах албаныхныг сонгон шалгаруулна гэдэг ойлголт орхигдсон.
Манай хүүхдийн цэцэрлэгийн дарга нэг мэдэхэд л солигдчихсон байдаг. Тухайн ажлын байранд сонгон шалгаруулалт хийж захирлаа сонгоогүй нь лавтай. Мөнгө ихтэй нэгнийг нь юм уу, танидаг талаа даргын албанд томилчихдог юм шиг санагддаг. Тэдгээр хүмүүс нь эргээд л  тэр цэцэрлэг, сургуульд өөрийнхөө хамаатан садныг ажилд авч эхэлдэг. Мэргэжлийн бус зөвхөн таньдаг хүнээ л багшлуулдаг гэсэн үг.  Өнөөх хамаатан садан нь мөн таньдаг талынхаа хүүхдийг цэцэрлэг, сургуульдаа хүмүүжүүлдэг. Энэ бол яг л сүлжээ шиг тархсан үзэгдэл. Одоо чиний хэлж буйгаар бүх улсын сургууль, цэцэрлэгийн захирлыг ил тодоор сонгон шалгаруулж  эхэлвэл энэ нь нийгэмд маш хэрэгтэй зүйл болно. Уг нь ямар ч газар ажлын байрны сонгон шалгаруулалт байдаг биз дээ. Гэтэл цэцэрлэг, сургуулийн  удирдах албаныхныг сонгон шалгаруулна гэдэг ойлголт орхигдсон байдаг.

Мишээл:"Орос-III" сургуулийн захирлыг шударгаар сонгох хэрэгтэй шүү

 Би Монгол-Оросын хамтарсан гуравдугаар сургуульд сурч байсан. Манай сургуулийн захирлыг ихэнх хүмүүс мэдэх байх. Найман жил төлбөрөө өгөөд сурсан хүүхдүүдийг шууд л унагачихдаг хүн. Хичээлийн шинэ жил эхлэхээр захиралд бас ангийнхаа багшид бэлэг аваачиж өгдөг байсан.  Тэгж байж л сурна шүү дээ. Ямартай ч энэ сургуулийн захирлыг бүх хүмүүст ил тод, шударгаар сонгох хэрэгтэй. Дахиад л мөнгө идэх гэсэн, хэн нэгний нэрээр гарч ирсэн захиралтай болгочихвол тэнд сурч буй хүүхдүүдэд, эцэг, эхчүүдэд хэцүү л байх.