Засгийн газраас оюутнуудад сар бүр олгож буй тэтгэлгийг сургуулиар нь дамжуулж биш хувийн картаар нь дамжуулж олгохоор болсон билээ. Энэ тэтгэлэгийг картаар авахын тулд оюутнууд 14 хоногийн дотор буюу 3-р сарын 11-нээс өмнө  дараах материалыг дурын нэг банкинд бүрдүүлэн өгч дансаа нээлгэх юм.

Үүнд:   -иргэний үнэмлэх
            -суралцагчийн үнэмлэх
            -суралцагчийн голч дүнгийн тодорхойлолт, хэвлэмэл хуудас
            -цээж зураг 2 хувь

Бүртгэл дууссаны дараа сонгогдсон арилжааны банкуудтай Сургалтын төрийн сан хамтран ажиллах гэрээ байгуулна. Арилжааны банк хамтран ажиллах гэрээ байгуулснаас 30 хүртэлх хоногийн хугацаанд суралцагчийн тэтгэлгийн картыг олгоно. Хэрэв хуурамчаар баримт бичиг бүрдүүлсэн тохиолдолд арилжааны банк суралцагчийг  бүртгэхээс татгалзаж,  хуулийн байгууллагад асуудлыг шилжүүлэх юм.

  Арилжааны банк нь оюутны тэтгэлгийн картыг үнэ төлбөргүй хэвлэж өгөхөөс гадна Сургалтын төрийн сангаас оюутны тэтгэлгийг банкинд шилжүүлсэнээс хойш ажлын нэгээс хоёр өдөрт багтаан суралцагчийн данс руу шилжүүлэх юм. Банк оюутны тэтгэлгээс ямар нэгэн шимтгэл авахгүй.

  2012-2013 оны хичээлийн жилд Засгийн газрын 1111 төв, БШУЯ-ны Боловсролын лавлах 1209 утсаар болон олон нийттэй харилцах албанд биечлэн хандсан нийт иргэдээс ирүүлсэн дээд боловсролын салбартай холбоотой санал гомдлын дийлэнх хувийг үндэсний тэтгэлэгтэй холбоотой асуудлууд  эзэлж байгаа юм. Энэхүү санал, гомдлыг агуулгаар нь ангилж үзэхэд "85 хувь нь үндэсний тэтгэлэг хугацаандаа буухгүй байна, 10 хувь олгогдохгүй байна" гэжээ.