Хоёр хоногийн дараа буюу ирэх сарын 1-нээс хэрэглэгчдэд Хүнсний бүтээгдэхүүний аюулгүй байдлыг хангах тухай хууль, Тамхины тухай хууль зэрэг 3 хууль хэрэгжиж эхэлнэ.  Гэвч тамхины тухай хуулиас бусад хоёр хуулийн тухай иргэд ямар ч мэдээлэлгүй байна.
Хүнсний тухай хуулийн шинэчилсэн найруулгыг өнгөрсөн оны 12-р сарын 20-нд баталсан бөгөөд 6 бүлэг 20 зүйлтэй. Энэхүү хуульд хүнсний хангамж, хүнсний үйл ажиллагаанд тавих шаардлагыг зааж өгчээ. Харин Хүнсний бүтээгдэхүүний аюулгүй байдлыг хангах тухай хууль мөн 12-р сарын 20-нд батлагдсан. 5 бүлэг 20 зүйлтэй. Энэхүү хуульд хүнсний чиглэлийн үйл ажиллагаа эрхлэх, хүнсний түүхий эд, бүтээгдэхүүнд тавигдах шаардлага, хүнсний түүхий эд, бүтээгдэхүүний аюулгүй байдлыг хангах талаарх төрийн чиг үүрэг, хяналт зэргийг тусгаж өгсөн байна.
Шинэчилсэн хуулиар бидний өдөр тутмын хэрэглээ болох хүнсний бүтээгдэхүүний шошго, хадгалалтын талаар нэлээд нааштай зохицуулалтууд орж ирсэн байна. Тодруулбал, бүтээгдэхүүний чанар, эрүүл ахуйн баталгаа, хүнсний түүхий эд, бүтээгдэхүүнд тавих хөндлөнгийн хяналт, зохицуулалт, хүнсний үйлдвэрлэл, худалдаа, үйлчилгээнд тавих хяналт, хүнсний экспорт, импортод тавих хяналт гэх мэт асуудлуудыг нарийвчлан зохицуулах юм.

Эдгээрээс хамгийн чухал гэж хэлж болохуйц нь импортын хүнсний шошгонд агуулагдах мэдээлэл Монгол хэлээр байхаар тусгагдсан байна. Түүнчлэн хүнсний бараа, бүтээгдэхүүнийг хувь хүмүүс хилээр оруулж ирэхийг хориглохоор заасан аж.

Шинэчилсэн найруулгаар хүнсний шошго нь дараах мэдээллийг агуулсан байна:
-хүнсний нэр;
-үйлдвэрлэгчийн нэр, хаяг;
-хэмжээ, тоо ширхэг, цувралын дугаар;
-үйлдвэрлэсэн он, сар, өдөр;
-хадгалах хугацаа, нөхцөл;
-тэжээллэг чанар, орц, найрлага;
-хэрэглэх арга;
-гаж нөлөө, хориглох заалт зэрэг бөгөөд эдгээр шаардлагыг хангаагүй тохиолдолд барааг буцаан татах заалттай.
Мөн хууль тогтоомж зөрчигчид хүлээлгэх хариуцлагын хувьд хөдөлмөрийн хөлсний доод хэмжээг 3-50 дахин нэмэгдүүлсэнтэй тэнцэх хэмжээний төгрөгөөр торгох олсон орлого болон үлдэгдэл хүнсийг хураах гэх мэт нэлээд өндөр торгуультай юм байна.

    Монголын хэрэглэгчийн эрх, боловсролын холбоог үүсгэн байгуулагч Б.Цэрэн “Энэ 3 хууль ихээхэн ач холбогдолтой. Тамхины тухай хууль батлагдсан өдрөөс одоог хүртэл уг хуулийн талаар маш идэвхтэй яриа мэдээллийн хэрэгсэл, твиттер, фэйсбүүкээр улс төрийн өндөр албан тушаалтнаас эхлээд жиргэж, ярьж, хэн сайн ярих уралдаан хүртэл хэлбэрт орж байна. Гэтэл хүнсний аюулгүй байдлын тухай хуулиудыг монголчуудад тайлбарлан таниулахгүй байна. Хүнсний тухай эдгээр 2 хуулиар дөнгөж төрснөөс эхлээд, настан буурлууд өдөр тутам, цаг, минутад хэрэглэдэг хүнсний бүтээгдэхүүнүүдийг нарийвчлан зааж өгсөн. Хүнсний бүтээгдэхүүнд зөвхөн Мэргэжлийн хяналтын газар хяналт тавина гэсэн зүйл үеэ өнгөрөөсөн утгагүй асуудал. Эдгээр хүнсний тухай хуулиудыг хэрэгжүүлэхийн тулд төрийн хяналтаас гадна гааль, хорио цээрийн хяналт, иргэн ТББ-ын хяналт зэрэг гурван хяналт байх ёстой. Тиймээс  нийт хэрэглэгчдэд  нэгдэж, дэмжихийг уриалж байна” гэв.

Эдгээр хуулиудын хэрэгжилтийг хангах нь зөвхөн төрийн чиг үүрэг биш ТББ-ын чиг үүрэг хэмээн үзэж Монголын хэрэглэгчийн эрх, боловсролын холбоог үүсгэн байгуулаад байгаа аж.