МАХН-ын Бага чуулган өнөөдөр хуралдах гэж байна. Энэ чуулганаар нэгэн цагт нэг намд харьяалагдаж байсан гишүүд нь МАН-ынхантай Ерөнхийлөгчийн сонгуульд ямар нэг байдлаар хамтрах уу гэдгээ шийдэх чухал хурал. Эндээс ямар шийдвэр гарах вэ гэдгийг МАХН-тай эвсч засагт орсон МҮАН ч тэр, Ерөнхийлөгчийн сонгуульд ялагдвал өндрөөс унах гээд байгаа МАН ч тэр чих тавин хүлээж цаашид ямар алхам хийх вэ гэсэн хувилбаруудаа бэлтгэж сууна. Н.Энхбаярын хувьд намынхантайгаа уулзаад эхлээд АН-тай ярьж үзээд болохгүй бол МАН-тай хэлэлцээрт ор гэсэн үүрэг өгсөн. АН-тай тохиролцохын тулд Н.Энхбаяр чухам ямар болзол тавьж байгаа нь тодорхойгүй байгаа бол МАН-аас тэд тодорхой хэдэн зүйл хүссэнийг УИХ-ын гишүүн З.Баянсэлэнгэ дурдсан юм. МАХН-ынхан АН-д болзол тавьж байгаа бол МАН-д шаардлага тавьж байна. Үүнд,

Нэгд. МАХН-ын дарга Н.Энхбаярыг суллуулахын тулд хүч хавсрах. МАН-ын нүүр царай болсон гишүүдийн нэг Ц.Нямдоржийг Н.Энхбаярыг баривчлах үеэр унтаж байсан гэсэн хариултанд эгдүүцсэн хүмүүс МАХН дотор олон бий. Дуулиант баривчилгааны үеэр МАН-ын удирдлагуудыг юу хэлэх бол гэж хүлээж байсан ч тэд “хуулийн дагуу шийдэх байх” гээд дор дороо чимээгүй сууцгаасан. Тиймээс МАХН-ынхан нэгэн цагт Н.Энхбаярын доор ажиллаж байсан хэрнээ нүүр бурууллаа хэмээн тухайн үеийн эрх баригчдыг хараан зүхэж байсан удаатай. Хэрэв МАН-ын удирдлагууд МАХН-тай эвсэхийн тулд энэ шаардлагыг нь хүлээн авбал цаашдаа маш олон зөрчил үүсгэх магадлалтай. Тухайлбал, МАН-ынхан Н.Энхбаярыг суллуулахын төлөө явбал шүүхийн шийдвэрийг эсэргүүцнэ гэсэн үг.

Хоёрт.  Оюутолгойн хөрөнгө оруулалтын гэрээг Монголын ард түмэнд ашиггүй байгуулснаа хүлээн зөвшөөрөх. Бас нэгэн гол тактик энд байна. МАН-ынхан эрх барьж байсан хугацаанд Оюутолгойн гэрээг байгуулсан. Тэднийг муу гэрээ байгуулаад хахууль авсан гэж хардагсад МАХН дотор цөөнгүй, улс төр ярих дутамдаа хөгжөөн яригсад бий. Хэрэв МАН-ынхан үүнийг хүлээн зөвшөөрвөл өөрсдийгөө хариуцлагагүй, ажилласан гэдгийг хүлээн зөвшөөрөхийн зэрэгцээ авлига авсан гэх хардлагыг улам лавшруулж өгөх аж. МАХН-ынхан ийм шаардлага тавьж буй нь ямар учиртай вэ хэмээвээс Оюутолгойн гэрээг эсэргүүцэж тэмцсэн тэд баатар болох, МАХН-ын гишүүд дэмжигчид, иргэний нийгмийнхэн зөв зүйлийн төлөө явж байжээ гэдгийг нотлохыг хичээж буй хэрэг.

Гуравт.  Намын нэрийг өөрсдийнхөө эрх ашигт нийцүүлж сольсон МАН-ын тухайн үеийн удирдлага намын гишүүд дэмжигчдээсээ уучлал гуйх ёстой.  Өөрөөр хэлбэл намын нэр сольсон нь алдаа боллоо гэдгээ хүлээн зөвшөөрөх. МАН-ын залуучууд нэрээ сольж, хоёр хуваагдснаар сонгуульд ялагдсан гэдгээ хүлээн зөвшөөрч, үүний бурууг намын удирдлагуудад тулгаж байна. Ерөнхийлөгчийн сонгуульд МАН-аас нэр дэвших магадлалтай гэж яригдаж буй У.Хүрэлсүх бол намын нэрийг сольсны гол хариуцлагыг үүрэх ёстой хүн мөнөөс мөн.

Дөрөвт, Нийгэмд шударга ёс тогтоохын төлөө тодорхой ажил хийж, ард түмнээс уучлал гуйх. Ингэж чадвал энэ намыг шинэчлэгдсэн байна, сэргээгдсэн байна гэж үзэх гэнэ.

   Эндээс харвал МАХН-ын дээрх шаардлагуудыг хүлээж авбал МАН нэг мөсөн шалдаа бууна. Аль ч шаардлага нь олно нийт дунд МАН-ын нэр хүндийг унагах зорилготой. Тэд хэлэлцээр хийх болсон тохиолдолд энэ шаардлагуудаа бууруулж магадгүй л юм. Гэхдээ МАН-тай хамтрах дургүйдээ биелүүлэхэд бэрх ийм шаардлага тавьж байгааг үгүйсгэхгүй.