УИХ-ын нэгдсэн чуулганаар хүнсний аюулгүй байдлыг хангах, Хүнсний тухай хуулийн шинэчилсэн найруулга болон энэхүү хуулийн дагалдах хуулиудыг хэлэлцэн баталсан. Хүнсний тухай хууль болон Хүнсний аюулгүй байдлын тухай хууль ирэх сарын 1-ний өдрөөс хэрэгжиж эхлэх юм. Эдгээр хуулиудын хэрэгжилтийг хангах нь зөвхөн төрийн чиг үүрэг биш ТББ-ын чиг үүрэг хэмээн үзэж Монголын хэрэглэгчийн эрх, боловсролын холбоог үүсгэн байгуулаад байгаа аж. Уг холбоог үүсгэн байгуулагч Б.Цэрэнгээс дараах тайлбарыг өглөө.

  -Тамхины тухай хууль батлагдсан өдрөөс одоог хүртэл уг хуулийн талаар маш идэвхтэй яриа мэдээллийн хэрэгсэл, твитер, фейсбүүкээр улстөрийн өндөр албан тушаалтанаас эхлээд жиргэж, ярьж, хэн сайн ярих уралдаан хэлбэрт орж байна. Тамхи бол мөнгөтэй, дуртай, донтой хэсэг бүлэг нийгмийн цөөнх л байна. Энэ тийм чухал сэдэв үү, гэтэл хүнсний аюулгүй байдлын тухай хуулиудыг Монголчуудад тайлбарлан таниулахгүй байгаа нь асуудал болж байна. Тиймээс манай холбооны зүгээс хэрэглэгчийн боловсролд анхаарч зарим ажлуудыг зохион байгуулж байна гэсэн юм.

  Шинэчилсэн хуулиар бидний өдөр тутмын хэрэглээ болох хүнсний бүтээгдэхүүний шошго, хадгалалтын талаар нэлээд нааштай зохицуулалтууд орж ирсэн байна. Тодруулбал, бүтээгдэхүүний чанар, эрүүл ахуйн баталгаа, хүнсний түүхий эд, бүтээгдэхүүнд тавих хөндлөнгийн хяналт, зохицуулалт, хүнсний үйлдвэрлэл, худалдаа, үйлчилгээнд тавих хяналт, хүнсний экспорт, импортод тавих хяналт гэх мэт асуудлуудыг нарийвчлан зохицуулах юм.

  Эдгээрээс хамгийн чухал гэж хэлж болохуйц нь импортын хүнсний шошгонд агуулагдах мэдээлэл Монгол хэлээр байхаар тусгагдсан байна. Түүнчлэн хүнсний бараа, бүтээгдэхүүнийг хувь хүмүүс хилээр оруулж ирэхийг хориглохоор заасан аж.

Шинэчилсэн найруулгаар хүнсний шошго нь дараах мэдээллийг агуулсан байна:
-хүнсний нэр;
-үйлдвэрлэгчийн нэр, хаяг;
-хэмжээ, тоо ширхэг, цувралын дугаар;
-үйлдвэрлэсэн он, сар, өдөр;
-хадгалах хугацаа, нөхцөл;
-тэжээллэг чанар, орц, найрлага;
-хэрэглэх арга;
-гаж нөлөө, хориглох заалт зэрэг бөгөөд эдгээр шаардлагыг хангаагүй тохиолдолд барааг буцаан татах заалттай.

   Мөн хууль тогтоомж зөрчигчид хүлээлгэх хариуцлагын хувьд хөдөлмөрийн хөлсний доод хэмжээг 3-50 дахин нэмэгдүүлсэнтэй тэнцэх хэмжээний төгрөгөөр торгох олсон орлого болон үлдэгдэл хүнсийг хураах гэх мэт нэлээд өндөр торгуультай юм байна.