МҮЭХ-ны Ерөнхий зөвлөлийн хурал яг одоо МҮЭХ-ны байранд болж байна. Уг хурлаар МҮЭХ-ны Ерөнхийлөгч С.Ганбаатарыг энэ албан тушаалаас нь огцруулах шийдвэр гарчээ. Учир нь түүнийг УИХ-ын гишүүн тул энэ ажлыг давхар хашиж болохгүй гэсэн шийдвэрийг Үндсэн хуулийн цэцээс гаргасан юм. Түүний оронд МҮЭХ-ны дэд ерөнхийлөгч Х.Амгаланбаатар түр орлон гүйцэтгэгчээр ажиллахаар болсон байна. МҮЭХ-ны Их хурал ирэх зургаадугаар сард болох бөгөөд 420 гаруй гишүүнтэй уг хурлаар шинэ Ерөнхийлөгчийг томилох юм.

  Харин УИХ-ын гишүүн С.Ганбаатар тус холбооны хүндэт ерөнхийлөгч гэсэн статустай болж байгаа аж. МҮЭХ-ны гишүүд түүнийг энэ ажлаас холдуулах хүсэлгүй байгаа ч нэгэнт Үндсэн хуулийн цэцийн шийдвэр гарсан тул ийнхүү анхны хүндэт ерөнхийлөгчөөр томилсон байна. Ерөнхий зөвлөлийн хурлаар одоо МҮЭХ-ны 2014 оны төсвийн талаар хэлэлцэж байгаа юм.