Иргэдийн унаа болж, хол ойрд хөл залгуулж байдаг нийтийн тээврийн үйлчилгээ хамгийн хариуцлагатай ажил мөнөөс мөн. Нийслэл хотын нийтийн тээврийн үйлчилгээнд 800 гаруй том оврын, 700 орчим бага оврын автобус, цөөн тооны троллейбус, 500 гаруй такси явдаг. Тэд хотынхоо сая гаруй хүнийг хотын нэг захаас нөгөө зах хүртэл очъё гэсэн газар нь хүргэж өгдөг. Гэвч нийтийн тээврийнхэн ямархуу дүр төрхтэйгээр үйлчилгээ үзүүлдэг бэ гэдгийг тэдгээрээр үйлчлүүлдэг хүн бүхэн мэднэ.

Нийтийн тээвэрт үйлчилж буй автобуснууд цагтаа амжих гэж яваа нэрийдлээр зорчигчдоо суудал дээр нь ойлгож буулган нисэх шахам давхилддаг.  Уг нь амь, амьдралтай хүн тээвэрлэж яваа юмсан.

2013 он гарсаар хоёрхон сар болоход нийтийн тээврийн хэрэгслийн жолооч нар 125 удаагийн зам тээврийн осол гаргаж, гурван хүний амь насыг хохироож, 46 хүнийг хүнд болон хөнгөн байдлаар гэмтээсэн байгаа юм. Үүний тод жишээ хэдхэн хоногийн өмнө СБД-ийн Дамбадаржаагийн гүүрэн дээр "Автобус 3" ХХК-ны /03-58 УБЧ/ дугаарын автобусны жолооч Н нь 4 настай хүүхдийг дайрч амь насыг нь хохироосон хэрэг.  Ганц энэ хэргээр ч тогтохгүй өдөр бүр ийм аймшигт ослыг нийтийн тээврийнхэн гаргаж байна гээд хэлчихвэл нээх хэлсдэхгүй нь лавтай.

 Тэгвэл өчигдөр  Замын цагдаагийн газраас Нийтийн тээврийн үйлчилгээ явуулдаг байгууллага аж ахуй нэгжүүдийн өглөөний гаралт, тээврийн хэрэгслийн бүрэн бүтэн байдал, жолооч нарын ажилд гарч байгаа бэлтгэл ажил зэрэгт гэнэтийн шалгалт хийсэн билээ.

   Шалгалтын үеэр ямар ноцтой зөрчил илэрснийг та бүхэнд танилцуулья.

Өчигдрийн шалгалтаар нийтийн тээврийн техникийн бүрэн бүтэн байдал хангалтгүй, гэрэлтүүлэх хэрэгслүүд гэмтэлтэй, жолоочийн тээврийн хэрэгслийн бичиг баримт зөрчилтэй байжээ.  Түүгээр ч зогсохгүй тээврийн хэрэгсэл жолоодох эрхээ хасуулсан, согтууруулах ундаа хэрэглэсэн үедээ үйлчилгээнд гарах гэж байсан жолооч нар ч байжээ. Эрхээ хасуулсан жолооч, согтуу жолооч үүнийг сонссон хэний ч зүрх шимширмээр. Тэд олон хүний амь насыг хариуцаж яваа гэдгээ төдийлөн ухамсарладаггүй юмуу даа гэмээр.  Мөн ээлжийн амралтаараа автобус компаниудын хооронд дамжин ажилладаг, ангилал ахиулах шалгалтанд орж байгаа нэрээр ангилалгүй жодооддог, ангилал ахиулах курст сууж байгаа хэрнээ нийтийн тээврийн хэрэгсэл дээр дадлага хийдэг зэрэг ноцтой зөрчлүүд илэрсэн байна.

Түүнчлэн энэ үед Эрдэм транс ХХК-ний Daewoo bus-105 маркийн 0603 УНБ улсын дугаартай автобусны жолооч согтууруулах ундааны зүйл хэргэлсэн үедээ тээврийн хэрэгсэл жолоодон үйлчилгээнд гарах гэж байсныг драгер үлээлгэхэд 0.69% гарсан байна.

“Мон-Кара” ХХК-ний жолооч нар нь өглөөдөө гарч байхад ямар ч хяналт байдаггүй. Тус компаний 2331 УБП улсын дугаартай Hyundai маркийн автобусны жолооч Ц.Охиноо нь тээврийн хэрэгсэл жолоодох эрхээ хасуулсан байсан. Мөн тухайн жолооч нь Автобус-3 компанид ажилдаг бөгөөд ээлжийн амралтаар “Мон-Кара” ХХК-нд ажиллаж байсан.

6374 УНЯ улсын дугаартай Hyundai маркийн автобусны жолооч Анхбаяр нь жолоодох эрхийн үнэмлэхгүй байсан бөгөөд шалгахад ВС ангилалтай тус автобусны кондуктороор ажилдаг D ангиллын курс сууж байгаа бөгөөд баазаас эцсийн буудал хүртэл 1.5 км газар дадлага хийх зорилгоор барьдаг гэж мэдүүлжээ.

Иймээс нийтийн тээврийн хэрэгслийн жолооч нар ноцтой зам тээврийн осол гаргаж байгаад анхаарах цаг болсныг дээрхи шалгалт харуулж байна. Замын цагдаагийн газраас дээрхи байдлыг таслан зогсоох зорилгоор холбогдох байгууллагуудтай хамтран ажиллахаар төлөвлөж байгаа юм.