Монголын Үндэсний бөхийн холбооноос Ерөнхий Боловсролын Сургуулийн хичээлийн хөтөлбөрт үндэсний бөхийн хичээл оруулахаар “Нутгийн салхи” хөтөлбөр хэрэгжүүлж байгаа юм. МҮБХ нь хот, хөдөөгийн ЕБС бүрт 6х10 метрийн харьцаатай хивс, найман ширхэг зодог шуудаг, “Монгол бөхөд анхлан суралцах бичиг” гарын авлага олгосон байна. Сургуулиудыг ийнхүү үндэсний бөхийн дэвсгэр хивс, хэрэглэгдэхүүн, гарын авлагатай болгосноор эрэгтэй хүүхэд бүр үндэсний бөхөөр барилдан өсдөг байсан уламжлалыг сэргээж, хатуужилт, ямар ч ажлын гар даах чадвартай эр хүнийг төлөвшүүлэх суурь нөхцлийг бүрдүүлж байгаа аж. Түүнчлэн “Монгол бөхөд анхлан суралцах бичиг” гарын авлагаар эрэгтэй эмэгтэй бүх сурагчдад хичээл орох юм байна. Ингэснээр зөв хүмүүжил төлөвшилтэй ирээдүйн иргэдийг бэлтгэхэд онцгой ач холбогдол үзүүлнэ гэж МҮБХ-ынхон үзэж байгаа гэнэ. Энэ төслийг УИХ-ын гишүүн Б.Бат-Эрдэнэ санаачилжээ.