Хууль зүйн дэд сайд Э.Эрдэнэжамьяан сайдын суудлаас огцрох өргөдлөө өгсөн, өгөөгүй гэх асуудал олны анхаарлыг татаад байна. Тэрбээр хоёр өдрийн өмнө “Би өргөдөл өгөөгүй. Энэ бол ташаа мэдээлэл” гэх тайлбарыг өгч байсан бол өнөөдөр нэгэн сонинд энэ талаараа тайлбар өгчээ.
    Хууль зүйн дэд сайд Э.Эрдэнэжамьяан сайдын суудлаас огцрох өргөдлөө өгсөн, өгөөгүй гэх асуудал олны анхаарлыг татаад байна. Тэрбээр хоёр өдрийн өмнө “Би өргөдөл өгөөгүй. Энэ бол ташаа мэдээлэл” гэх тайлбарыг өгч байсан бол өнөөдөр нэгэн сонинд энэ талаараа тайлбар өгчээ.

    Өнгөрсөн амралтын өдөр болсон МАХН-ын Гүйцэтгэх товчооны хурал нэлээн ширүүхэн болж өндөрлөсөн. Уг хурлаар сайд нарын хөдөө томилолтоор явах тухай асуудлыг хэлэлцжээ. Мөн намын дарга Н.Энхбаярын биеийн байдлын талаар хэрхэн анхаарч ажиллахыг ярьж байгаад маргасан байна. Намын генсек Г.Шийлэгдамба Хууль зүйн дэд сайд Э.Эрдэнэжамьяанг сайн ажиллаагүй хэмээн шүүмжилжээ. Үүнд эгдүүцсэн Э.Эрдэнэжамьяан “Би хуулийн хүрээнд өөрийн чадах зүйлээ хийж байгаа. Энэ том Яамны ажлыг унагалгүй, шинэчлэлийн бодлогын эрчийг нь сааруулалгүй аль чадах чинээгээрээ ажиллаж байна. Н.Энхбаяр даргын хэлмэгдүүлэлтийн эсрэг, эрүүл мэндэд нь анхаарал тавиагүй өдөр гэж байхгүй. Гэхдээ хангалтгүй гэж үзэж байгаа бол асуудалгүйгээр өөрөө өргөдлөө өгчихье. Дэд сайдын суудалд шунаад, үхэн хатан зууралдаад байх шалтгаан надад алга” гэсэн аж. Мөн МАХН-ын зарим удирдлага ажлаа хийж чадахгүй, чухал үед алга болчихдог, нам зохион байгуулалтын хувьд муу байгаагаас болж төлөвлөсөн зүйл ажил хэрэг болохгүй байгааг шүүмжилсэн байна.

    Ийнхүү бухимдаж өргөдлөө өгөхөд МАХН-ын генсек Г.Шийлэгдамба “Х.Тэмүүжинд өг” гэсээр өргөдлийг авалгүй гарч оджээ. Тиймээс Э.Эрдэнэжамьяан “Сайдад өгөх нь өөр асуудал. Намын бодлогоор, намын шийдвэрээр дэд сайдын албанд очсон нам дээр эхэлж ярилцаж байж шийдэх ёстой. Би Тэмүүжингийн үүдийг сахиж байгаад ажилд гуйж орсон хүн биш шүү дээ” гэсэн байна.

    Ийнхүү Н.Энхбаярыг сайтар халамжилсангүй гэж зэмлүүлсэн МАХН-ын удирдлагууд дотроо хагаралдаад авчээ. Ерөнхийлөгчийн сонгуульд хэрхэн оролцох тал дээр нэгдсэн байр суурьтай болж чадаагүй тэд ийнхүү зөрчилдөж эхэлсэн нь намынх нь гишүүдийн санааг зовоож эхэлсэн байна.

    Юутай ч намын шийдвэрээр дэд сайд болсон тэрээр сайдын суудлаас огцрох эсэхийг намаараа ярилцаж байж шийдэх ёстой гэж үзжээ. Гэвч намын генсек Г.Шийлэгдамба өргөдлийг хүлээн аваагүй учраас энэ асуудлыг дахин хэлэлцэх шаардлагагүй болсон аж. Интерполд дур мэдэн захидал бичсэн гэх Э.Эрдэнэжамъяан дэд сайдын суудал дахиад нэг удаа дэнжигнээд тогтов бололтой.