Япон орны бэлгэ тэмдэг болсон сакура мод цэцэглэж эхэллээ, Тус улсын Цаг уурын албанаас сакурагийн цэцэглэлт өнгөрсөн бямба гаригаас эхлэнэ гэж албан ёсоор зарласан. Гэвч Токио, Шизүока, Кумамото мужид үүнээс хэд хоногийн өмнө сакура мод хаврын гоёлоо өмсөж амжжээ. Энэ хавар зарим нутагт эрт дулаарсан нь үүнд нөлөөлсөн аж. Японы нутгийн өмнөд, хойд хэсэгт харилцан адилгүй хугацаанд сакура цэцэглэж эхэлдэг боловч Шинто шашны Ясукуни сүм дэх модод цэцэглэхэд арлын улс даяар баярлан тэмдэглэдэг юм.

Цэцэглээд долоо ч хонолгүй "нуцгэрдэг" энэ сонин мод "Амьдрал дэндүү богино шүү" гэдгийг япончуудад "сануулдаг" гэнэ. Гэвч Япон орон даяар эхний мод цэцэглэхээс эхлээд сүүлийн сакура гоёлоо гөвж дуусах хүртэл нэг сар гаруй хугацаа өнгөрдөг.

Саукура цэцэглэлтийн оргил үе энэ долоо хоногт тохиох бөгөөд энэ үеэр япончууд ажил хэргээ хойш тавьж,  цэцэрлэгт хурээлэнгээр хамт олон, найз нөхөд, гэр бүлийнхээ хамтаар зугаалан, үзэсгэлэнт модны доор суух дуртай.