Нийслэлийн хөдөлмөрийн газраас ажилгүй иргэдийг ажилд зуучлах шинэ ажил зохион байгуулж буй сургаар ажлын байрны бүртгэл зуучлал хариуцсан мэргэжилтэн Н.Амарбаясгалантай уулзаж, зарим зүйлийг тодрууллаа.

-Нийслэлийн хөдөлмөрийн газар 2013 он гарснаас хойш хэчнээн ажлын байрны захиалга ирээд байна. Аль салбарын ажил эрэлттэй байна ?

- Он гарснаар нийт 800 гаруй ажлын байрны захиалга ирсэн. Үүнээс салбараар нь ангилвал жолооч, оффис менежер, нягтлан бодогч, тогооч, зөөгч, барилгын салбар болон бусад туслах чанарын ажлууд түлхүү ирсэн байна. Ажилгүй иргэдийн дийлэнх нь 18-45 насныхан. Харин 45-аас дээш насны иргэдэд харуул, жижүүр гэх мэт  ажлын байрны захиалгууд ирдэг.

-Хөгжлийн бэрхшээлтэй иргэд рүү чиглэсэн үйл ажиллагаанууд их явуулах болсон. 2013 он гарснаас хойш хөгжлийн бэрхшээлтэй иргэдийн хандалт хэр байна?

- 2013 он гарснаас хойш 200 гаруй хөгжлийн бэрхшээлтэй иргэд бүртгүүлснээс 100 гаруйг нь тохирох ажлын байранд нь зуучилж мөн мэдээлэл зөвлөгөө өгч ажиллаж байна.

-Хөгжлийн бэрхшээлтэй иргэдийг ажлын байраар хангах талын ажлыг байнга зохион байгуулдаг уу?

-Хөгжлийн бэрхшээлтэй иргэдийн талаар долоо хоног бүрийн тавдахь өдөр Хөгжлийн бэрхшээлтэй иргэдийн холбооны тэрхүүлэгчидтэй уулзалт зохион байгуулж  тэдгээр иргэд  юу хийх талаар зөвлөлдөн ажиллаж байна. Энэхүү холбоотой цаашид хөгжлийн бэрхшээлтэй иргэдийн талаар олон зүйл дээр хамтарч ажиллахаар болсон.

-Эхний ээлжинд ямар ажил зохион байгуулахаар зөвшилцөв?

- Эхний ээлжинд  дүүргүүдийн  хөгжлийн бэрхшээлтэй иргэд  хариуцсан гэрээт ажилчдад сургалт зохион байгуулахаар төлөвлөж байгаа.  Мөн ажил олгогч байгууллагуудтай хамтран ажиллаж  сургалтанд хамруулна.  

-Хөгжлийн бэрхшээлтэй иргэдийн хийж бүтээсэн буюу урласан зүйлээр үзэсгэлэн гаргадаг. Энэ ажил хэзээ зохион байгуулагдах вэ?

-Нийслэлийн хөдөлмөрийн газар нь хөгжлийн бэрхшээлтэй иргэд рүү чиглэсэн олон ажлуудыг зохион байгуулдаг.Үүнээс дурьдвал: "Бид бүгдийг чадна" хөгжлийн бэрхшээлтэй иргэдэд зориулсан яармагийг  Хөдөлмөрийн яам, Хууль зүйн яам болон бусад төрийн болон төрийн бус байгууллагуудтай хамтран жил бүр зохион байгуулдаг. Мөн  "Хүртээмжтэй орчин" өдөрлөг, мөн Тулга-5 студитэй хамтран хөгжлийн бэрхшээлтэй иргэдийн хөдөлмөр эрхлэлтийн талаарх  "Хөдөлмөрийн харилцаа" нэвтрүүлгийг 25 дугаар суваг телевиз, UBS-үүдээр тус тус хүргэн ажиллаж байна. Мөн "Таны оролцоо-Бидний ирээдүй" сонинтой хамтран хөгжлийн бэрхшээлтэй иргэдэд тохирох ажлын байрны захиалгуудыг тус сонинд гаргаж  үнэ төлбөргүйгээр хөгжлийн бэрхшээлтэй иргэдэд хүргэж байгаа. Цаашид олон ажлуудыг төлөвлөн зорилго тавин ажиллаж байна.

-Ганц хөгжлийн бэрхшээлтэй иргэд ч биш, хоригдлуудыг ажлын байраар хангах ажил зохион байгуулдаг гэсэн. Энэ ажил хэр ахицтай байна?

- Нийслэлийн Хөдөлмөрийн газар,    Шүүхийн шийдвэр гүйцэтгэх ерөнхий газартай “Хамтран ажиллах гэрээ”- нд тусгагдсаны дагуу өнгөрсөн оноос ШШГЕГ-ын харъяа  хорих ангиудаас суллагдах хугацаа нь болж байгаа хүмүүжигч нарт “Ажил мэргэжлийн чиг баримжаа олгох” сургалтыг зохион байгуулдаг болсон.  Тус сургалтаар 2012 онд суллагдах 407, 431, 409, 441, 421-р ангийн  409 хүмүүжигч нарт  суллагдан гараад нийгмийн харилцаанд бие даан хэрхэн оролцох,   ажил мэргэжлийн чиг баримжаа олгох зөвлөгөө өгч ажилласан.  Харин энэ жил  мөн тухайн хорих ангиудаар явж ял эдлээд 2013 онд суллагдах гэж байгаа энгийн иргэд, хөгжлийн бэрхшээлтэй иргэдэд ажил мэргэжлийн чиг баримжаа олгох сургалтуудыг  хүргэнэ. Энэ ажил ирэх сараас эхэлнэ.

-Нийслэлийн хөдөлмөрийн газарт иргэд бүртгүүлэхдээ ямар бичиг баримт бүрдүүлэх ёстой вэ?

- Нийслэлийн хөдөлмөрийн газарт бүртгүүлэхдээ иргэний үнэмлэх, нэг хувь цээж зурагтай ирээд мэргэжилтнүүдээс анкет авч бөглөөд сонирхосон ажлын байрандаа зуучлуулж болно. Ажилгүй иргэдэд зориулсан сургалтыг тогтмол зохион байгуулж байгаа учир иргэд идэвхтэй оролцохыг уриалж байна.