МАХН-аас зохион байгуулж байгаа “Шударга ёсны аян 2013” бүс нутгийн их хуралдай Өмнөговь аймагт болж байна.Говийн бүсийн их хуралдайд УИХ-ын дэд дарга Л.Цог, МАХН-ын дэд дарга, Шадар сайд Д.Тэрбишдагва, Эрүүл мэндийн сайд Н.Удвал, Аюулгүй байдал, гадаад бодлогын байнгын хорооны дарга Ц.Цолмон, МАХН-ын ЕНБД Г.Шийлэгдамба нар хүрэлцэн ирсэн юм. “Шударга ёсны аян 2013” говийн бүсийн их хуралдайг Өмнөговьд товлон хуралдуулж байгаа нь учиртай. Баéгалийн баялаг, нутаг орны хөгжил, уул уурхай, түүнийг дагасан хөндөх асуудал олон.
Өмнөговьчууд өнгөрсөн онд мал сүргээ 0.4 сая болгон өсгөж 17 мянган төл авч 100 хувь бойжуулж байгаа аж. Мөн төсөвт төвлөрүүлсэн мөнгөн дүнгээрээ 78 хувьтай, үүнээс 11 тэрбум төгрөгийг эрүүл мэндийн салбарт хөрөнгө оруулалт хийсэн байна. Хэдийгээр ололт, амжилт арвинтай байгаа ч хүн амын өвчлөл, уул уурхайн салбар, газар нутаг, Оюутолгойг тойрсон асуудлууд гээд тулгамдсан сэдэв олон байгааг мөн дурьдлаа. Харин сайд нар Өмнөговь аймагт тулгамдаад байгаа гол асуудлуудыг бичгээр хүлээн авахаа хэлсэн юм. Шадар сайд Д.Тэрбишдагва “Бид орон нутагт очиж тулгамдсан асуудлуудыг сонсоод, хураагаад өнгөрмөөргүй байна. Тиймээс та бүхэн бидэнтэй хамтран шийдвэрлэх асуудлаа бичгээр өгч, харин бид шийдэх арга замыг олох шаардлагатай байна” хэмээн ярьсан юм.
“Шударга ёсны аян 2013” хуралдайд Дорноговь, Говьсүмбэр, Дундговь зэрэг аймгуудаас ирсэн юм. Дорноговь аймгийн иргэн Х.Янжмаа “Бидний төрсөн нутаг харийнхны гарт хэрхэн сүйрч байгааг харах эмгэнэлтэй байна. Дээр уул уурхайгаас үүдэлтэй тоосжилт нутгийн хүн амын дийлэнхэд нөлөөлж харшил, амьсгалын дээд замын өвчлөлтэй болоход нөлөөлж байна. Тиймээс сонгууль болохоор ирдэг, бусад үед биднийг мартдаг УИХ-ын гишүүдийг бидэнтэй ирж уулзаачээ гэж хэлмээр байна” хэмээн ярьсан юм. Харин Өмнөговь аймгийн иргэн П.Батболд “Манай баруун зүүн хил дээр байдал ямар хүнд байгааг хэн ч ярихгүй байна. Бүхэл бүтэн улсын хилээр Саосгобисэнд гэсэн гурван уурхай л нүүрс зөөхөд ашиглаж байна. Ер нь энэ газар нутагт энгийн иргэд битгий хэл сайд дарга нар ч чөлөөтэй явж чадахгүй тийм л байдалд хүрсэн байна. Монгол хүн баялагтаа эзэн суух нь битгий хэл газар шороон дээрээ бусдаас асууж, зөвшөөрөл авч байна алхана гэдэг юу гэсэн үг вэ. Тиймээс бид одоо л жинхэнэ шударга ёс гэж байдаг бол түүнийг тогтоох цаг нь аль хэдийн болсон” гэсэн юм.
