УИХ-ын Өргөдлийн байнгын хорооноос “100 мянган айлын орон сууц” хөтөлбөрийн хэрэгжилтэд тавих хяналтын талаарх нээлттэй сонсголыг Төрийн ордонд зохион байгуулж байна.

 Иргэн Б.Гантөгс, С.Балжинням, Н.Батсайхан нарын 21 иргэн уг хөтөлбөрт хамрагдахаар хүсэлт гаргасан ч зургаан хувийн хүүтэй зээлийн олголт зогссон учир УИХ-ын Өргөдлийн байнгын хороонд ханджээ. Эдгээр иргэний өргөдлийг авч үзсэний үндсэн дээр байнгын хороо өнөөдөр тус сонсголыг зохион байгуулж байгаа юм.

Хэлэлцүүлгийг нээж байнгын хорооны дарга Р.Бурмаа хэлэхдээ, "100 мянган айлын орон сууц" төслийг хэрэгжүүлэх, бага дунд орлоготой иргэдийг бага хүүтэй зээлд хамруулах замаар орон сууцжуулах  жилийн зургаан хувийн хүүтэй хөнгөлөлттэй зээл олгогдохгүй байгаа шалтгааныг олж тогтоох, иргэдийг хохиролгүй болгох арга замыг олох, УИХ-ын тогтоолын заалт ямар үе шаттай хэрэгжих талаар мэдээлэл авах зорилготой юм гэлээ.

 Анх 4000 гаруй иргэн зургаан хувийн хүүтэй зээлд хамрагдахаар материалаа бүрдүүлжээ. Шаардлага хангасныг нь ОССК Төрийн банканд хүргүүлсэн байна. Гэвч санхүүжилт зогссон гэсэн шалтгаанаар 2600 гаруй иргэний материалыг хүлээн аваагүй аж. Иргэд энэ ажилд бараг нэг жилийг зарцуулж, багагүй мөнгө үржээ. Түүний дээр хэтэрхий олон бичиг баримт бүрдүүлснээс гадна зарим барилгын компани тодорхой хэмжээний урьдчилгаа төлөхийг шаардсан учир зээл авах, хашаа байшингаа худалдах зэргээр хохирсон байна.

 Нээлтòэй сонсголд Өргөдлийн байнгын хорооны гишүүд, тус байнгын хороонд өргөдөл гаргасан 21 иргэн, ажиглагч иргэд, мөн Барилга, хот байгуулалтын яам, Сангийн яам, Эдийн засгийн хөгжлийн яам, Орон сууц санхүүжилтын корпораци, Хөгжлийн банк, Төрийн банкны төлөөлөл оролцож байна.