“Дайны эрсдлийн даатгал” гэгчийг бий болгож, мөнгө угаасан хэрэгт МИАТ-ын захирал асан Ц.Орхон, "Монголиан Эйрлайнес" компанийн эзэн Ч.Хоролсүрэн, түүний төрсөн дүү Ч.Суурьтогтох, Н.Гантөмөр, МИАТ ХК-ийн гүйцэтгэх захирлын албан тушаалыг хашиж байсан гавьяат нисгэгч Р.Бат-Эрдэнэ, Ц.Орхоны эхнэр Ү.Цэцэгмаа, Төрийн өмчийн хороонд ажиллаж байсан С.Батхишиг, МИАТ-ын захирал асан Б.Эрдэнэбилэгийн төрсөн дүү Б.Мандахбаяр нарын есөн хүн холбогдоод буй.
    “Дайны эрсдлийн даатгал” гэгчийг бий болгож, мөнгө угаасан хэрэгт МИАТ-ын захирал асан Ц.Орхон, "Монголиан Эйрлайнес" компанийн эзэн Ч.Хоролсүрэн, түүний төрсөн дүү Ч.Суурьтогтох, Н.Гантөмөр, МИАТ ХК-ийн гүйцэтгэх захирлын албан тушаалыг хашиж байсан гавьяат нисгэгч Р.Бат-Эрдэнэ, Ц.Орхоны эхнэр Ү.Цэцэгмаа, Төрийн өмчийн хороонд ажиллаж байсан С.Батхишиг, МИАТ-ын захирал асан Б.Эрдэнэбилэгийн төрсөн дүү Б.Мандахбаяр нарын есөн хүн холбогдоод буй. Тэднийг Төв аймгийн Урьдчилан хорих төв, Зүүнхараагийн хорих анги, ШШГЕГ-ын харьяа хорих 461 дүгээр ангид хуваан саатуулаад байгаа.

    Мөрдөн байцаалтын явцад долоон сая гаруй ам.долларын хохирол учруулсан нь нотлогдоод байгаа учраас Эрүүгийн хуулийн тусгай ангийн 150.3-т зааснаар эрүүгийн хэрэг үүсгэн шалгаж байгаа билээ.

    Түүнчлэн уг хэрэгт Төрийн өмчийн хорооны дарга асан Д.Сугарыг холбогдуулан шалгахаар болсон. Гэвч Д.Сугар нь Үндсэн хуулийн цэцийн гишүүн учраас түүний бүрэн эрхийг түдгэлзүүлсний дараа шалгахаар болсон билээ. Тиймээс УЕПГ-аас бүрэн эрхийг нь түдгэлзүүлэх хүсэлтийг Үндсэн хуулийн цэцэд хүргүүлсэн боловч цэцээс түдгэлзүүлэх шаардлагагүй гэсэн хариу өгсөн билээ. Харин мөрдөн байцаалтын явцад Д.Сугар нь уг хэрэгт холбоотой нь тогтоогдсон учраас УЕПГ-аас эрхийг нь түдгэлзүүлэх хүсэлтийг Үндсэн хуулийн цэцэд дахин хүргүүлэхээр болоод байгаа. Тэгэхдээ энэ удаад Д.Сугарыг МИАТ-ын хэрэгт холбогдуулан шалгах хангалттай баримтыг цэцэд хүргүүлэх юм байна. Хэрвээ цэцээс эрхийг нь түдгэлзүүлвэл Д.Сугарыг сэжигтнээр тооцон, мөрдөн байцаалтын ажиллагааг явуулах аж.

    Мөн уг хэрэгт зарим хорих ангийн дарга нар шалгагдаж болзошгүй талаар эх сурвалж мэдээлэв. Учир нь Хууль зүйн сайд Х.Тэмүүжин “Сэжигтнүүд хорионд байх хугацаандаа хоорондоо гар утсаар холбоо барьж, мэдээлэл солилцох замаар өмнө өгсөн мэдүүлгээ өөрчилж эхэлсэн нь хэргийн мөрдөлтөд саад учруулж байна” хэмээн мэдээлсэн. Тиймээс холбогдох газраас сэжигтнүүдийн хэрэглэж байсан гар утсыг хураан авч, хэн хэнтэй харилцсан хийгээд хорих ангид гар утас нэвтрүүлэх зөвшөөрлийг хэн өгсөн, тусалсан, холбогдох бүх хүмүүсийг шалгаж эхэлсэн байна. Энэ нь даамжирч, зарим нэг хорих ангийн удирдлагууд ч холбогдож болзошгүй байна.

    Сэжигтнүүдийн хувьд бүгд нэг, нэг өмгөөлөгч сонгосон бөгөөд Ц.Орхон өмгөөлөгчөөрөө Ц.Монголыг сонгоод байгаа юм. Мөн Ц.Монгол өмгөөлөгч Ц.Орхоны биеийн байдал муу хэмээн батлан даалтад гаргах хүсэлтийг УПЕГ-т хүргүүлсэн ч хүсэлтийг хүлээн авахаас татгалзаж, Ц.Орхоныг яллагдагчаар татан, хорих хугацааг сунгасан юм.